Beket-ata.kz saıty iske qosyldy (FOTO)
QMDB tóraǵasy, Bas múftı Naýryzbaı qajy Taǵanulynyń óńirlerdegi úgit-nasıhat jumystaryn kúsheıtýge baılanysty tapsyrmasyna oraı Mańǵystaý oblystyq ortalyq «Beket ata» meshitiniń beket-ata.kz resmı saıty iske qosylyp, tanystyrylymy ótti.
Elimizdegi Epıdemıologııalyq jaǵdaıǵa oraı, atalmysh saıttyń tusaýkeseri onlaın formatta ótti. Is-shara barysynda Mańǵystaý oblysynyń bas ımamy Ánýar Izimbaıuly dinı aqparattyń qoǵam ómirindegi mańyzdylyǵyn atap ótip, saıt ujymyna jemisti jumys, shyǵarmashylyq tabys tiledi.
«Biz aqparattyq dáýirde ómir súrýdemiz. Osy tusta bul saıttyń iske qosylýy – biz úshin úlken jetistik. Endigi jerde, oblys kólemindegi dinı-tanymdyq baǵyttaǵy jańalyqtar men maqalalar, jamaǵatymyzǵa osy saıt arqyly beriledi», – dedi Ánýar Izimbaıuly.
Saıtta el jáne oblys deńgeıindegi dinı jańalyqtar, tanymdyq maqalalar, ózekti dinı suraq-jaýaptar, Mańǵystaý ólkesiniń kórikti jerleriniń 3-D panoramalary jáne vıdeo ýaǵyzdar jarııalanady.
