BILIM – SARQYLMAS QAZYNA

Qurmetti qaýym!

Barsha mektep oqýshylary men stýdentterdi, muǵalimder men bilim salasynyń qyzmetkerlerin, sonyń ishinde «Nur-Múbarak» ýnıversıtetiniń, medrese-kolledjderdiń ustazdary men shákirtterin 1 qyrkúıek – Bilim kúnimen shyn júrekten quttyqtaımyn! Bolashaqtyń irgesin qalaıtyn shákirtterge jańa oqý jylynda tabys pen bereke tileımin!

Bilim alý úshin kúsh-jiger, talap-talpynys qajet. Sonda ǵana alǵan bilimniń nátıjesi bolady. Asyl dinimizde musylmandardyń bilim alýy – mindet. Alla Taǵala «Alaq» súresinde: «Oqy! Jaratqan Rabbyńnyń atymen oqy! Ol (Alla) adamdy uıyǵan qannan jaratty. Oqy! Seniń Táńiriń eń ardaqty! Ol qalammen jazý úıretti. Adamdarǵa bilmegenin úıretti», – deıdi. Ardaqty Paıǵambarymyz (oǵan Allanyń salaýaty men sálemi bolsyn) da: «Bilim alý musylman er men áıelge – paryz», – dep bilim alýdyń dindegi orny erekshe ekenin eskertken. Sondyqtan bizdiń ǵylym-bilim úırenip, bilgenimizdi basqalarǵa úıretýimiz – paryz. Sebebi, hadısterden jetkendeı, bilimdi jaıý – Alla jolynda jasalǵan úlken sadaqa. Sonymen qatar bilim – baqyttyń kilti, jánnatqa jeteleıtin úlken nyǵmet. Bilimdi adamnyń bu dúnıede de, o dúnıede de júzi jaryq.

Mahmud Qashǵarıdiń: «Ulym saǵan aıtaıyn ósıetin dananyń, Bilimdini tany da, sońynan er, qaraǵym» dese, Shákárim qajy Qudaıberdiuly: «Talaptan da bilim men óner úıren, Bilimsiz, ónersiz bolady aqyl tul», – degen. Sebebi aqyldy asyl etetin – bilim.

Endeshe, shákirtterimizdiń bilim jolyndaǵy qadamyna nur jaýsyn dep tileımin! Jaratýshy Iemiz olardyń alǵan bilimin kádege asyryp, elimiz ben jerimizdiń bolashaǵy úshin qyzmet etýin násip etsin! Ámın!

Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy, Bas múftı