BIRLIK BAR JERDE BEREKE BAR
Asa qamqor, erekshe meıirimdi Allanyń atymen bastaımyn!
Qadirli qaýym!
Barshańyzdy rýhanı kelisim kúnimen shyn júrekten quttyqtaımyn! Otbasylaryńyzǵa baq pen bereke, yntymaq pen tatýlyq tileımin.
Tekti babamyzdan ǵasyrdan ǵasyrǵa jalǵasqan, tálim men tárbıeniń bastaýy bolǵan asyl dinimiz Islam birlik pen beıbitshilikke úndeıdi.
Kúlli ómiri adamzat balasyna ónege bolǵan ardaqty Paıǵambarymyz Muhammed (oǵan Allanyń salaýaty men sálemi bolsyn) alǵashqy amalyn musylman úmbetin baýyrlastyrýdan, qasıetti Mádınada qonystanǵan rý men taıpalardy tatýlastyrýdan bastady. Osylaısha birlik pen baýyrmaldyq negizinde Islam dini órkendeı bastady.
Shyn máninde, rýhanı kelisim – bereke men baqyttyń bastaýy. Qablısa jyraý babamyzdyń:
– Baqyt qaıda barasyń?
– Kórshimen bolǵan birligi,
Taǵat, ǵıbadat tirligi
Uıymshyl elge baramyn, – dep jyrlaýy tegin emes.
Jaratýshy Iemiz Quranda «Allanyń dininen bekem ustanyńdar, bólinbeńder» dep buıyrsa, ardaqty Paıǵambarymyz (oǵan Allanyń salaýaty men sálemi bolsyn): «Men sizderge kópshilikpen birge bolýǵa keńes beremin. Bólinýden saqtanyńyzdar...» dep ósıet etken.
Hákim Abaı bul ósıetti: «Birińdi qazaq biriń dos, kórmeseń istiń bári bos» degen oımen sabaqtastyrdy. Memleket basshysy, qadirli Qasym-Jomart Kemeluly aıtqandaı, «qoǵamdaǵy birlik pen kelisimdi kózdiń qarashyǵyndaı saqtaýymyz kerek. Biz qashan da alaýyzdyqqa qarsy tura bilgen elmiz».
Alla Taǵala elimizdiń syrtyn jaýdan, ishin daýdan saqtaǵaı. Ámın!
Naýryzbaı qajy TAǴANULY
Qazaqstan musylmandary dinı
basqarmasynyń tóraǵasy, Bas múftı
