«Biz birgemiz, tilegimiz – ortaq»: Qyrǵyz eliniń múftıi de duǵa etýge shaqyrdy
Qyrǵyzstan musylmandary dinı basqarmasynyń tóraǵasy Maqsatbek qajy Toqtomýshev Qazaqstan musylmandary dinı basqarmasynyń tóraǵasy Naýryzbaı qajy Taǵanulynyń musylman álemine jasaǵan úndeýine qoldaý bildirip, duǵa etýge shaqyrdy.
Óziniń qoldaýyn QMDB-ǵa joldaǵan hatynda tolyq baıandaǵan. Sondaı-aq Qyrǵyzstan múftııatynyń saıtynda da jarııalandy. Qyrǵyzstan múftıi joldaǵan hatta:
«Baýyrlas elderdiń yntymaǵyn arttyryp, san ǵasyr boıy qalyptasqan dástúrdi jalǵastarǵanyńyzǵa rızashylyǵymdy bildiremin. Biz Sizdiń musylman álemine joldaǵan osynaý Úndeýińizge únsiz qala almaımyz, baýyrlas qyrǵyz halqy da bir mezette duǵada bolmaq. Álemdi jaılaǵan indetpen kúreste musylmannyń qarýy bolǵan duǵa arqyly kúresýge biz de shaqyramyz. Qıyn sátte barsha musylmannyń tize qosyp, birlikte duǵa etýine shaqyrǵan Úndeýińizge qoldaý bildiremiz» delingen.
Eske sala ketsek, QMDB tóraǵasy 10 sáýir kúni juma namazynyń ýaqytynda barsha musylman jurtshylyǵyn Allaǵa duǵa etýge shaqyrǵan bolatyn.
