«Bólim saǵaty»: dinı bilim jáne kadr daıarlaý boıynsha jumys esebi tyńdaldy (FOTO)

Elordada Bas múftı Naýryzbaı qajy Taǵanulynyń tóraǵalyǵymen «Bólim saǵaty» jobasy aıasynda QMDB Dinı bilim jáne kadr daıyndaý bóliminiń jumysy esebi tyńdaldy. Bólim meńgerýshisi Smaıyl Seıitbekov dinı saýat ashý kýrstary, talapkerler ázirleıtin daıyndyq kýrstary, Quran súrelerin jattaý kýrstary, qarılar daıyndaý ortalyqtary, Islam ınstıtýty, joǵary oqý orny, medrese-kolledjder jumysy týraly atqarylǵan is-sharalardyń esebin Bas múftıge baıandap berdi.

Búginde QMDB-ǵa qarasty 6 Qarılar daıyndaý ortalyǵy bar. 2020 jyly 24 qarı osy ortalyqty bitirip shyqty. QMDB-ǵa qarasty 9 medrese-kolledjde 2010-2020 jyldar aralyǵynda 2328 shákirt bilim alyp, olarǵa dıplom tabystaldy. Al 2001 jyly ashylǵan «Nur-Múbarak» ýnıversıtetinde osyǵan deıin 2059 stýdent oqýyn aıaqtap, dıplomyn aldy. 2012 jyly atalǵan oqý ornynda doktorantýra ashyldy. QMDB-ǵa qarasty Respýblıkalyq ımamdardyń bilimin jetildirý ıslam ınstıtýty 2002 jyldan beri qyzmet atqaryp keledi. Instıtýtta osyǵan deıin 1257 ımam bilimin shyńdady.

Bólimniń jumys esebin tyńdaǵan Bas múftı Naýryzbaı qajy Taǵanuly sapaly dinı kadr daıyndaý máselesine basa nazar aýdardy. «Dinı bilim jáne kadr daıyndaý bólimi – Dinı basqarmadaǵy negizgi bólimderdiń biri. Biz shákirtterdiń ǵylymı jobalarmen aınalysýyna, ónertapqysh stýdentterdiń halyqaralyq baıqaýlarǵa qatysýyna óz tarapymyzdan barynsha qoldaý kórsetýimiz tıis. Sonymen qatar úzdik shákirtter men tolyq jetim, turmystyq jaǵdaıy tómen otbasylardan shyqqan stýdentterge shákirtaqy berý qaıyrymdylyq jobasyn únemi jalǵastyrýymyz kerek. Dinı basqarmanyń 30 jyldyq mereıtoıyna oraı 30 shákirtke berilgen grantty kelesi jyly da toqtatpaýymyz kerek. Jumys barysynda sapaly dinı kadr daıarlaýǵa basa nazar aýdarylsyn» dedi Bas múftı Naýryzbaı qajy Taǵanuly.

Jıyn sońynda bólim meńgerýshisine naqty tapsyrmalar berildi.