Densaýlyq — amanat: Elordanyń dinı qyzmetkerleri jurtty vaktsına alýǵa shaqyrdy (FOTO+VIDEO)
Nur-Sultanda din ókilderi koronavırýsqa qarsy vaktsına aldy, dep habarlaıdy elorda ákimdiginiń resmı saıty.
Dúnıe júzine qaýip tóndirip turǵan koronavırýs indetin toqtatýdyń jalǵyz joly – jappaı vaktsına alý. Sebebi KVI-men aýyratyndar ımmýnıtet qalyptastyra almaıdy. Al karantınge deıingi ómirge oralý úshin tıisti shekteý sharalaryn saqtaý qajet.
Elorda din ókilderi búginde indetti jeńýdiń eń senimdi joly — vaktsınatsııa ekenine senimdi. Olar jurtty jaýapkershilik tanytyp, koronavırýsqa qarsy vaktsına alýǵa shaqyrdy.
Aıta ketý kerek, vaktsınanyń quramyna sol aýrýdy týdyratyn belsendi emes mıkroorganızmder engiziledi. Osynyń nátıjesinde ımmýndy júıe buryn-sońdy bolmaǵan qaýipti sezip, aǵzaǵa antıdene bóledi.
«Árkim óz densaýlyǵynyń saqshysy ekenin umytpaýy tıis. Asylynda, densaýlyq – amanat ekeni áýelden belgili. Bir-birimizge janashyr bolaıyq», - dedi ekpe alǵan Nur-Sultan qalasy «Sádýaqas qajy Ǵylmanı» meshitiniń bas ımamy Hamzat Ádilbekov.
Elordada COVID-19 ınfektsııasyna qarsy ekpe alǵandardyń qatarynda Islamtanýshy Ábdirahman Qoıbaǵar, sol sııaqty shirkeýlik Eparhııa qyzmetkeri Andreı Ozımın, Nur-Sultan qalasy Konstantın-Elenın ǵıbadathanasynyń klırıgi Maksım Madjıtov boldy.
Aıta keteıik, adamzat ómiri men densaýlyǵyna qaýip tóndirip otyrǵan COVID-19 indetin jeńýdiń eń tıimdi joly – vaktsınatsııa arqyly ujymdyq ımmýnıtetti damytý. Ujymdyq ımmýnıtet damyǵan jaǵdaıda koronavırýsqa deıingi qalypty ómirge orala alamyz. Al ujymdyq ımmýnıtet damý úshin elorda turǵyndarynyń 60%-y ekpe alýy qajet.
