Dinı basqarma esepshileri Kókshetaýda bas qosty (FOTO)

Qazaqstan musylmandary dinı basqarmasyna qarasty óńirlerdegi meshitterdiń esepshileri Kókshetaý qalasyna jınalyp, jyl basynan bergi jumystaryn qorytyndylady.

Qazaqstan halqy assambleıasynyń «Dostyq» úıinde ótken alqaly jıyn Aqmola oblysynyń bas ımamy Qýanysh Jumabaıulynyń kirispe sózimen ashyldy.Bas ımam esep-qısap jumysynyń da din nasıhatyna qatysy bar ekenin atap ótti. «Kúndelikti qaıyrymdylyq sharalar qarjysyz atqarylmaıdy. Meshitke kómek surap kelgen birde-bir adam bos qaıtarylmaıdy», – dedi ol.

Odan keıin negizgi kún tártibindegi máselelerdi QMDB bas esepshisi Laýra Baıjarasova baıandady. Bas esepshi is-sharanyń Kókshe jerinde ótýiniń mańyzdylyǵyna toqtala kelip: «Elimizdegi dinı uıymdardyń esep-qarjylyq jumystary bir ortaq júıege engizildi. Zamanaýı talaptar da eskeriledi. Osynyń bári esep jumysyndaǵy júktemeni jeńildetedi», – dedi.

Jıyn barysynda jarty jyl ishinde óńirlerdiń esepshileri atqarǵan jumys qorytyndysy aıtyldy. Osylaı ár óńirden kelgen din qyzmetkerleri óz oılaryn ortaǵa salyp, pikir almasty. Aldaǵy ýaqytta jumys yrǵaǵyn jaqsartý máseleleri keńinen talqylanyp, tıisti sheshimder qabyldandy.

Shara sońynda belsendi jumysymen kóringen birqatar qyzmetkerler Bas múftı Naýryzbaı qajy Taǵanulynyń alǵys hatymen marapattaldy.

​