Dinı basqarmanyń tól telearnasy ashyldy (FOTO)

Búgin Almatyda Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń qatysýymen múftııattyń tól telearnasy iske qosyldy. «Halyq arna» dep atalǵan jańa arnanyń ashylýyna Marat Toqashbaev, Saıyn Moldaǵalıuly, Asyly Osman, Asylbek Boranbaev syndy el aǵalary men óner maıtalmandary qatysty.

«Dinı basqarma jyl basynan beri negizinen qaıyrymdylyq baǵytta jumys istep keledi. Degenmen qazirgi aqparat ǵasyrynda jańa tehnologııany ıgerip, jańalyq berýdiń televızııalyq tásilin ózimizden basqarýdy uıǵardyq. Osyǵan oraı QMDB janynan respýblıkalyq «Halyq arna» atty tól telearnamyzdy ashqaly otyrmyz. Qazirgi tańda arnaǵa qajetti kontent jınaqtaý jumystary aıaqtaldy. Dinı baǵyttaǵy baǵdarlamalar, suhbattar, sıýjetter men beınerolıkterdiń basym bóligi QMDB-nyń bas keńsesinde túsiriledi. Maqsatymyz dástúrli Islamdy keńinen nasıhattaý. Allaǵa shúkir, bul úlken is boldy. Dinniń nasıhaty jolynda tabysty arna bolsyn», – dedi shara barysynda Naýryzbaı qajy Taǵanuly.

Tanystyrylym sharasynda QMDB Tóraǵasy arnanyń Bas dırektory Nurjan Darqulovty kópshilikke tanystyrdy. Resmı ashylýdan soń qonaqtar telestýdııa men redaktsııa bólmesin aralady. 24 saǵat habar taratýǵa qaýqarly telearna qajetti mamandarmen tolyq qamtylǵan. Shara sońynda el aǵalary ıgi tilegin bildirip, jyrdan shashý shashty.

Aıta keteıik «Halyq arna» «Otaý tv» men «Idtv» kabeldik jelileri arqyly habar taratady.