Dinı basqarmanyń jumys toby 6 kúnde 113 shara ótkizdi (FOTO)

20 qyrkúıek 2021 2558 0
Оqý rejımi

QMDB-nyń Tóraǵasy, Bas múftı Naýryzbaı qajy Taǵanuly bastaǵan Dinı basqarmanyń arnaıy jumys toby 13-17 qyrkúıek aralyǵynda Atyraý oblysynda bolyp 113 shara ótkizdi.

Bas múftı Naýryzbaı qajy Taǵanuly Atyraý qalasynda oblys ákimimen óńirdegi dinı ahýaldy talqylady, odan ary jergilikti ákimdikte memlekettik mekeme basshylarymen kezdesip, dinı ońaltý jumystary jaıly pikir almasty. Sondaı-aq «Imanǵalı» ortalyq meshitinde Atyraý ımamdaryna dáris oqydy, «Mektepke jol» qaıyrymdylyq aktsııasyna qatysty. Atyraýda jeke kezdesýler men yqpal etý sharalaryn júrgizdi. Atap aıtqanda, «Imanǵalı» ortalyq meshitinde 3 jat aǵym ókilimen kezdesý ótkizdi.

Budan bólek QMDB Tóraǵasy «Jýsan» operatsııasy arqyly elge oralǵandar áıeldermen júzdesip, «Imanǵalı» ortalyq meshitinde juma ýaǵyzy men namazy ótkizdi, qaıyrymdy kásipkerler alqasy múshelerimen kezdesip, olarǵa alǵys hat tabystady. «Jat aǵymnyń aldyn alý jáne onyń ádistemesi» atty 3 kúndik ımamdar semınaryn támamdap, ımamdarǵa sertıfıkat tabystady.

QMDB Tóraǵasy sondaı-aq Atyraý qalasy Bereke aýylyndaǵy «Quran jattaý jáne dinı saýat ashý» ortalyǵyn saltanatty túrde ashyp berdi. «El úlesi – páterge» jobasy aıasynda jas ustazdar men ımamdarǵa 453, 454, 455-baspana kiltin tabystady. Atyraý qalasynda salynyp jatqan jańa meshittiń qurylysymen tanysty jáne Atyraý QTJ temirjoly qyzmetkerlerimen jáne atyraýlyq jýrnalıstermen kezdesý ótkizdi.

Naýryzbaı qajy Taǵanuly Qurmanǵazy aýdandyq Mádenıet úıinde mamandarmen júzdesti jáne jat aǵym ókilimen jeke kezdesý ótkizdi. Sondaı-aq Qurmanǵazy aýdandyq «Temiráli» meshitiniń jamaǵatymen kezdesti. Bas múftı Mahambet aýdanynyń Saraıshyq aýylynda bolyp, «Saraıshyq» meshitiniń irgetasyn qalaý rásimine qatysty jáne Saraıshyq murajaıynda Handar ordasyn zııarat etti. Bas múftı Atyraý saparynda barlyǵy 22 is-shara ótkizdi, oǵan 2858 adam qatysty.

Dinı basqarmanyń arnaıy jumys tobynyń músheleri Sansyzbaı Shoqanov, Batyrjan Mansurov, Qanat Alshynbaev, Hamzat Ádilbekov, Arman Qýanyshbaev, Rızabek Battaluly, Ǵazız Ahmetov, Ulan Sharıpov, Amantaı Sadıev te osyndaı mańyzdy is-sharalardy ótkizdi. Jumys toby Atyraý qalasy men oblysyna qarasty meshitterde ýaǵyz-nasıhat aıtyp, H.Dosmuhamedov atyndaǵy Atyraý memlekettik ýnıversıtetinde, Salamat Muqashev atyndaǵy Atyraý polıtehnıkalyq kolledjinde, «ARES» kolledji men Aqparat taldaý ortalyǵynda kezdesýler ótkizdi.

Sondaı-aq Atyraý oblysynyń Polıtsııa departamenti; Sybaılas jemqorlyqqa qarsy agenttiktiń oblystyq departamenti, oblystyq ádilet basqarmasy, ÝG-157/11 áıelder túzetý mekemesi, 157/9 túzetý mekemesi t.b nysandarda arnaıy júzdesýler ótkizdi.

Qortyndylaı aıtqanda, múftııattyń jumys toby Atyraý oblysynda 6 kún ishinde barlyǵy 16 711 adamdy qamtyǵan 113 shara ótkizdi.

Pіkіrler Kіrý