DINI SARAPTAMA MAMANDARYNYŃ SEMINARY ÓTTI (FOTO)
29 qarasha men 1 jeltoqsan kúnderi aralyǵynda Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń tapsyrmasymen Dinı saraptama bóliminiń Astana men Almaty, Shymkent jáne oblystardaǵy bekitilgen jaýapty mamandaryna arnalǵan onlaın semınar ótti.
Is-sharanyń maqsaty – elimizde basylyp jatqan dinı ónimderdiń sapa-mazmunyn baqylap, QMDB Saraptaý komıssııasynan ruqsat almaǵan kitaptardy satýǵa jáne taratýǵa tyıym salý. Onlaın semınarǵa naıb múftı Sansyzbaı Qurbanuly men Dinı saraptama bóliminiń meńgerýshisi Nurlan Qaıyrbekov qatysyp, jaýapty mamandarǵa baǵyt-baǵdar usynyp, naqty tapsyrmalar berdi.
«Jazýshy-ǵalymdardyń dinı taqyryptarǵa qalam terbeýi, sózsiz súıispenshilik týdyrady. Alaıda, kirshiksiz asyl dinimizge kúıe jaǵatyn beısaýat kitaptar da joq emes. Mine, bizdiń maqsatymyz – sondaı eńbekterdi tamyrymen julyp otyrý», – deıdi Sansyzbaı Qurbanuly.
Sondaı-aq semınar barysynda ár óńirden saraptama isi boıynsha bekitilgen ımam-ustazdardyń biliktilik dárejesi týrasynda sóz bolyp, birqatar aımaqtarda saraptama ustazdary qaıta bekitildi. Bul óz kezeginde elimizde basylyp shyǵatyn dinı ádebıetterdiń mazmunyn anaǵurlym sapaly etýge septigin tıgizbek.
«Endi meshit kitaphanalarynda, úlken zaldaǵy sórelerinde, dinı dúkenderde, medreselerde, saýat ashý ortalyqtarynda, qala berdi namazhanalarda qoıylyp jáne satylyp júrgen dinı kitaptardyń barlyǵy Qazaqstan Respýblıkasy Din isteri komıteti Dintaný saraptamasynyń jáne QMDB Saraptaý komıssııasynyń oń qorytyndysyn alǵan bolýy shart. Mundaı talap oryndalmaǵan jaǵdaıda, ondaı kitaptar Dinı saraptama komıssııasynan ótýi tıis, áıtpese josparly kezeńmen basqarmamen maquldanbaǵan kitaptardy taratýǵa jáne satýǵa tyıym salynatyn bolady» dedi Nurlan Qaırbekov.
Onlaın semınar sońynda óńirlerdegi ımam-ustazdardyń talap-tilegi tyńdalyp, 2023 jylǵa deıin naqty atqarylýy qajet tapsyrmalar bekitildi.
