DOSTYQ ÚIINDE «BABALAR IZIMEN» KITABYNYŃ TANYTYMY ÓTTI (FOTO)

Astana qalasynyń ókili, «Áziret Sultan» meshitiniń bas ımamy Erbolat Júsipovtyń basshylyǵymen Astana qalasyndaǵy Dostyq úıinde «Babalar izimen: Qazaq dalasyndaǵy musylmandyq mektep» kitabynyń tanytymy bolyp ótti.

Igi sharaǵa QMDB Sharıǵat jáne pátýa bóliminiń meńgerýshisi, naıb múftı Sansyzbaı Qurbanuly, Astana qalasy Din isteri basqarmasynyń basshysy Qaırolla Dúıseshuly jáne elordalyq ımamdar qatysty. Kópshilikke eńbektiń qundylyǵy túsindirilip, kitaptyń qysqasha mazmuny tanystyryldy. Sondaı-aq, saltanatty túrde kitaptyń lentasy qıyldy.

Bul eńbekte asyl dinimiz ıslamnyń Qazaq dalasyna kelý tarıhy, halqymyzdyń ádet-ǵurpy men salt-dástúrindegi dinniń alar orny men babalar ustanǵan sharıǵat paryzdary, ıman negizderi, sondaı-aq musylmandyq ádep joralǵylary qamtyldy. Kitap úsh bólimnen turady. Birinshi bólim «Dástúrli dinı tanymnyń tarıhı negizderi» dep atalady. Ekinshi bólim dástúrli dinı tanym ustyndaryna arnaldy. Al úshinshi bólimde din men dástúr sabaqtastyǵy keńinen jazylǵan.