EL – ÚLESI PÁTERGE: BIR APTADA 13 OTBASY BASPANALY BOLDY
Ótken aptada QMDB Tóraǵasy, Bas múftı Naýryzbaı qajy Taǵanulynyń bastamasymen «Zeket jáne qaıyrymdylyq» qorynyń «El – úlesi páterge» jobasy aıasynda 13 otbasy baspanaly bolyp, jańa qonysqa kirdi.
Ózderińizge belgili, bıylǵy kóktem, ókinishke oraı elimizge ońaı tıip jatqan joq. Elimizdiń 10 oblysyn sý basyp, kólemi jaǵynan mundaı apat sońǵy 80 jyldaǵy eń iri tabıǵı apat bolyp otyr. Dana halqymyz «Kúsh – birlikte» deıdi. Baspanasynan aırylyp, japa shekken myńdaǵan otbasynyń qaıǵysy bárimizge ortaq. Osynaý qıyn-qystaý kezeńde birlik pen yntymaqtyń qadiri artýda. Zardap shekken otbasylarǵa kómek kórsetý úshin «Zeket jáne qaıyrymdylyq» qory «El úlesi – páterge» jobasy boıynsha turǵyndardy baspanamen qamtamasyz etýge aıryqsha den qoıdy.
Atalmysh joba aıasynda 10 páter sý tasqynynan zardap shekken otbasylarǵa berilse, qalǵan úsh páter jalǵyzbasty analarǵa, kóp balaly, asyraýshynan aırylǵan otbasylarǵa «El úlesi – páterge» jobasy aıasynda tabystaldy. Tasqyn sýdan zardap shekken Arqalyq turǵyny jańa qonys kiltin bas múftı Naýryzbaı qajy Taǵanuly qolynan alyp, rızashylyǵyn bildirip ótti. Al, Batys Qazaqstan oblysynda jańa páter QMDB Tóraǵasynyń orynbasary, naıb múftı Ershat Aǵybaıulynyń tilegimen tabystaldy. QMDB Áıel-qyzdar sektorynyń uıytqy bolýymen qaıyrymdylyq jármeńkesi ótip, jınalǵan qarajat atalmysh eki páterdi satyp alýǵa jumsalǵanyn aıta ketken jón.
Sondaı-aq, «Zeket jáne qaıyrymdylyq» qorynyń dırektory Maqsatbek Maqsotuly Atyraý oblysynda taǵy bir otbasyn jańa qonyspen qýantty. Aıtýly sharada janashyr azamattar men aýyl turǵyndary izgi tilegin jaýdyryp, jańa qonysqa bereke tileýde.
