Elbasy «Áziret Sultan» meshitinde boldy (FOTO+VIDEO)
Memleket basshysy jurtshylyq aldynda sóılegen sózinde barsha qazaqstandyqtardy Qurban aıt merekesimen quttyqtap, bul meıramnyń beıbitshilik pen adal nıetke negizdelgen sımvoldyq mániniń zor ekenin jáne ıslamnyń myzǵymas rýhanı qundylyqtaryn aıqyndaıtynyn, sondaı-aq meıirimdilik pen izgiliktiń, jaqsylyqtyń jarshysy bolyp sanalatynyn atap ótti.
– Qazaqstannyń barsha musylman qaýymyn osy merekemen quttyqtaımyn! Sizderdiń barlyq duǵa-tilekterińizdi Alla qabyl etsin! – dedi Nursultan Nazarbaev.
Qazaqstan Prezıdenti Qurban aıttyń mán-mańyzy tek namaz oqýmen jáne qurbandyq shalýmen shektelmeıtinin aıtty, sondaı-aq jaǵdaıy joq otbasylarǵa, jetimderge, qarttar men barlyq muqtaj jandarǵa qaıyrymdylyq tanytyp, kómek kórsetýge shaqyrdy.
Memleket basshysy búginde Qazaqstanda dinderdiń órkendeýi úshin jáne olardyń konfessııalyq ustanymdaryna qaramastan dinı ǵuryptarynyń oryndalýyna barlyq jaǵdaı jasalyp otyrǵanyn aıtty.
– Jýyrda Astanada jahandyq jáne konfessııaaralyq dıalog pen qarym-qatynastardyń odan ári damýyna serpin beretin álemdik jáne dástúrli dinder kóshbasshylarynyń VI sezi ótedi, – dedi Nursultan Nazarbaev.
Qazaqstan Prezıdenti Qurban aıttyń tereń mán-mazmuny qonaqjaılyqty, dostyq pen birlikti qasterleıtin halqymyzdyń rýhanı qundylyqtarymen jáne mádenıetimen úndesetinin atap ótti.
– Barshańyzǵa zor densaýlyq, árbir otbasyna baq-bereke tileımin! Qazaqstanymyz órkendep, elimizde árdaıym dostyq, tynyshtyq pen turaqtylyq saltanat qura bersin! – dedi Memleket basshysy.
