Elorda ımamdarynyń biliktiligin arttyrý semınary ótti

Astana qalasynyń bas ımamy Erbolat Júsipovtiń bastamasymen Dinı bilim jáne kadr daıyndaý baǵyty aıasynda elorda ımamdaryna arnalǵan biliktilikti arttyrý semınary ótti.

Ǵylymı basqosýda QMDB tóraǵasynyń orynbasary, naıb múftı, Sharıǵat jáne pátýa bóliminiń meńgerýshisi, bilikti ustaz Sansyzbaı Qurbanuly arnaıy dáris oqydy.

Dáris barysynda ýsýl fıqh (ıslam quqyqtanýynyń ádisnamasy) taqyryby keńinen túsindirildi. Atap aıtqanda, sharıǵat úkimderiniń negizderi – Quran, súnnet, ıjma jáne qııas uǵymdaryna toqtalyp, olardy durys túsiný men qoldanýdyń mańyzdylyǵy aıtyldy. Sonymen qatar, dinı mátinderdi taldaýdaǵy qaǵıdalar, úkim shyǵarýdaǵy ádister jáne qazirgi qoǵamdaǵy máselelerge sharıǵı turǵydan jaýap berý joldary jan-jaqty qarastyryldy.

Naıb múftı ımamdarǵa ýsýl fıqh iliminiń tereńdigin meńgerý – pátýa berý men halyqqa durys baǵyt kórsetýde asa mańyzdy ekendigin atap ótti. Ásirese, zamanaýı suraqtarǵa jaýap berý kezinde dálelge súıený, asyǵystyqqa jol bermeý jáne ǵylymı ustanymdy saqtaý qajettigine basa mán berildi. Semınar barysynda qatysýshylar ózara tájirıbe almasyp, kókeıdegi suraqtaryna jaýap aldy.