Elorda shákirtteri arasynda hadıs jattaýdan jarys ótti (FOTO)

Búgin el astanasyndaǵy «Sheıh Kýnta qajy» meshitinde Elorda meshitteriniń burymdy shákirtteriniń arasynda hadıs jattaýdan jarys bolyp ótti. Jarysqa Elorda meshitteri boıynsha uzyn sany 33 shákirt qatysyp, ózderiniń bilimderi men jattaý qabiletterin synǵa saldy. Qasıetti Ramazannyń sońǵy kúninde osylaısha ardaqty Paıǵambarymyzdyń (s.ǵ.s.) ósıetteri jas shákirtterdiń tilimen Elorda tórinde jańǵyryp, saýaby men syılyǵy qatar qýantqan berekeli jarys boldy.

Saltanatty baıqaýdyń ashylýyna arnaıy qatysyp, izgi tilegin bildirgen «Sheıh Kýnta qajy» meshitiniń bas ımamy Smataev Ibragım ardaqty Alla Elshisiniń (s.ǵ.s.) súnnetin súıip, hadısterine amal etýdiń qanshalyqty abzal amal ekendigin aıtyp, búgingi jarysqa qatysýshy shákirtterge óz rızashylyǵyn jetkizdi. Sondaı-aq, meshit ustazy Laýra Arystanbekqyzy qatysýshylarǵa jarys tártibin túsindirip, «Sheıh Kýnta qajy» meshitiniń qyzdar-áıelder sektorynyń uıytqy bolýymen uıymdastyrylyp otyrǵan sharanyń maqsat-mańyzyn atap ótti.

Shákirtter bilimin «Ǵylmanı» meshitiniń ustazy Kóksegen Aıgúl men «Sheıh Kýnta qajy» meshitiniń ustazy Arystanbekqyzy Laýra hanymdar saraptap, jalpy upaı sany boıynsha júldeger anyqtaldy. Júzden júırik shyǵyp, jeńis tuǵyrynan tabylǵan tómendegi shákirtterge arnaıy syılyqtar tabystaldy:
1 oryn Ozdoeva Aısha(sheıh Kýnta qajy meshiti)
2 oryn Alıakbar Aqmarjan ( Sádýaqas Ǵylmanı meshiti)
3 oryn Matseeva Aısha (sheıh Kýnta qajy meshiti)