ELORDADA II RESPÝBLIKALYQ «QAIYRYMDYLYQ JARSHYLARY» ERIKTILER FORÝMY ÓTTI (FOTO)
Búgin elordada Qazaqstan musylmandary dinı basqarmasyna qarasty «Zeket jáne qaıyrymdylyq» qorynyń uıymdastyrýymen «QAIYRYMDYLYQ JARSHYLARY» II respýblıkalyq eriktiler forýmy ótti.
Forým jumysyna QMDB Tóraǵasy, Bas múftı Naýryzbaı qajy Taǵanuly bastaǵan múftııat ujymy men din qyzmetkerleri, BAQ ókilderi, sondaı-aq «Zeket jáne qaıyrymdylyq» qorynyń óńirlerdegi ókilderi men eriktiler qatysty.
Jıynda alǵysóz sóılegen Bas múftı: «Qazaq halqynda: «On adam júrgen jerde iz qalady, Myń adam júrgen jerde jol qalady» degen qanatty sóz bar. Sizder izgi isterge iz ben jol qaldyryp júrgen qaıyrymdy jandarsyzdar. «Qaıyrymdylyq jasasań – qaıyryn óziń kóresiń» demekshi, jaqsylyq jasaý – qanymyzǵa sińgen qasıettiń biri. «Asar», «jylý jınaý» syndy dástúrimizde bar ǵuryptar urpaqtan urpaqqa jalǵasyp, jas býyn ókilderin izgilikke úndep keledi.
Qazaqstan musylmandary dinı basqarmasy osynaý ıgi dástúrimizdi jańǵyrtý maqsatynda jýyrda ǵana Din men dástúr bólimin ashty. Sonymen qatar «Zeket jáne qaıyrymdylyq» qorynyń jumys baǵyttarynyń biri – saltymyzda saqtalǵan qaıyrymdylyq is-sharalardy sózben ári ispen kóbirek nasıhattaý.
«Zeket jáne qaıyrymdylyq» qory el jastaryn ıgi iske yntalandyrý maqsatynda byltyr «Qaıyrymdylyq jarshylary» atty birinshi forým ótkizdi. Oǵan ózderińiz de kýásizder. Alǵashqy forýmnan qazirgi kúnge deıin barlyq óńirlerde 50-den asa is-shara ótkizilip, eriktilerdiń jalpy sany 5 myńnan asty. Eriktilerimiz, odan bólek, elimizde bolyp ótken úlken apattarda da óz kómekterin aıamady. Atap aıtsaq, Ekibastuz qalasynda bolǵan apatta, Abaı oblysynda, Atyraý, Astana qalalarynda alapat órt oryn alǵanda aıanbaı qyzmet etti.
Jaratýshy Alla Taǵala Quran aıatynda: «Izgi isterde bir-birińe járdemdesińder», – deıdi. Paıǵambarymyz (oǵan Allanyń salaýaty men sálemi bolsyn) kúlli adamzatqa joldaǵan ósıetinde eń jaqsy adamnyń boıyndaǵy izgi qasıetin tilge tıek etip: «Adamdardyń eń jaqsysy – adamdarǵa paıdaly bolǵandary», – degen. Alla Taǵala siz ben bizdi aınala-tóńiregimizge paıdaly bolǵan musylmandardan etkeı» dedi.
Sondaı-aq forýmda «QAIYRYMDYLYQ JARSHYLARY» eriktileriniń kelbeti», «QAIYRYMDYLYQ JARSHYLARY» eriktileriniń jyldyq josparyn bekitilip, Úzdik qaıyrymdylyq joba» men «Jyl janashyry» tańdalyp, marapattaldy.
