Elordada IH respýblıkalyq qarılar baıqaýy bastaldy (FOTO+VIDEO)
Elordadaǵy «Áziret Sultan» meshitinde Qazaqstan musylmandary dinı basqarmasynyń uıymdastyrýymen Quran Kárimdi jatqa jáne mánerlep oqýdan IH respýblıkalyq baıqaý bastaldy.
72 úmitker qatysyp jatqan baıqaýdyń ashylý rásimine QMDB tóraǵasy, Bas múftı Naýryzbaı qajy Taǵanuly arnaıy qatysyp, sóz sóıledi. Qasıetti Quran Kárim oqylyp, Bas múftı duǵa jasady.
«Barshańyzǵa Allanyń amandyǵy men bereketin tileımin. Rabbymyz búgingi ıgi sharamyzdyń sátti ótýin násip etsin. Ámın!
Asyl dinimiz Islamdaǵy eń abzal qulshylyq – Quran oqý jáne ony jattaý. Áıgili sahaba Osman ıbn Affannyń (oǵan Alla razy bolsyn): «Júrekterimiz taza bolǵanda, Rabbymyzdyń sózine toımas edi. Shyn máninde, men bir kúnimdi de Quranǵa kóz salmaı ótkizýdi qalamaımyn» degen sózinde úlken mán men maǵyna jatyr.
Al adamdardyń eń abzaly – Qurandy jatqa biletinderi. Hadıs-sharıfte ardaqty Paıǵambarymyz Muhammed (oǵan Allanyń salaýaty men sálemi bolsyn) «Adamdardyń eń jaqsysy – Qurandy jatqa bilgen, Allanyń dinin jaqsy túsingen, Alladan qatty qoryqqan, adamdardy jaqsylyqqa shaqyryp, jamandyqtan tyıǵan jáne týǵan-týyspen qarym-qatynasy óte kórkem bolǵan jan» degen.
Qurmetti qarılar! Búgingi baıqaýdyń maqsaty – jattaǵan Qurandaryńyzdy esterińizge qaıta túsirý, halyqaralyq jarystarǵa qazaqstandyq qarılardy qatystyrý, oblystyq, aýdandyq, qalalyq meshitke bir qarıdy qyzmetke taǵaıyndaý, elimizde qarılar ortalyǵynyń jumysyn jandandyrý, ózderińizdeı Quran jattaǵan jandardyń sanyn arttyrý.
Osy rette ádilqazy bolyp saılanǵan tájirıbeli Kámiljan, Sádýaqas, Erkinbek, Ersin, Jumanazar qarılarymyzdyń jumysyna bereke tileımiz. Myńnan tulpar, júzden júırik qarıdy anyqtaıtyn baıqaýdy bastaýǵa ruqsat. Igi sharany ashyq dep jarııalaımyn. Barshańyzǵa Alla jar bolsyn!» dedi Bas múftı.
Aıta keteıik, eki kúnge sozylatyn qarılar baıqaýy Dinı basqarmanyń 30 jyldyǵyna oraı uıymdastyryldy. Eldegi pandemııaǵa baılanysty baıqaýdyń «Hıkmet stýdııasynyń» YouTube-arnasynan, «Halyq Arna» telearnasy jáne Múftııattyń Instagram-daǵy resmı paraqshasynan onlaın kórsetilimi ótip jatyr.
