ELORDADA «ISLAM JÁNE ADAL QOǴAM» KITABYNYŃ TANYSTYRYLYMY ÓTTI
Qazaq rýhanııaty taǵy bir salmaqty dúnıemen tolyqty. Búgin Astana qalasyndaǵy Nur-Sultan meshitinde Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń «Islam jáne adal qoǵam» atty kitabynyń tanystyrylymy ótti.
Jıynǵa Memleket jáne qoǵam qaıratkerleri, ǵalymdar, zııaly qaýym ókilderi men din salasynyń mamandary qatysty.
Barsha oqyrman qaýymǵa arnalǵan irgeli eńbekte otbasy qundylyǵy, jaýapkershilik, adam arasyndaǵy qarym-qatynas, qoǵamǵa paıda keltirý jáne jamandyqtan saqtaný máseleleri qozǵalady.
Saltanatty rásimde QMDB tóraǵasy, Bas múftı Naýryzbaı qajy Taǵanuly alǵy sóz sóılep, jańa eńbektiń maqsaty men mazmunyna toqtaldy.
«Halqymyzdyń asyl perzenti Ábish Kekilbaevtyń «Adamdy adam etken – kitap, adamzat etken – kitaphana» degen tamasha sózi bar. Kitap bilimpazdyqqa, janashyrlyqqa, parasattylyqqa, eńbekqorlyqqa baýlıdy.
Prezıdentimiz bir sózinde: «Biz, eń aldymen, jastardy kitap oqýǵa baýlýymyz kerek. Sonda jappaı kitap oqıtyn ultqa aınalamyz. Kitapqumarlyq – jaqsy qasıet. Shyn máninde, ozyq oıly ult bolýdyń eń tóte joly – kitap oqý. Sondyqtan kitap oqý mádenıetin qoǵamda barynsha ornyqtyrýymyz kerek» degen edi.
Allaǵa shúkir, qazir qoǵamda, ásirese jastar arasynda kitap oqýǵa yqylas tanytyp júrgen jas býyn ókilderi kóbeıip keledi. Bul – jaqsylyqtyń nyshany dep atar edim. Qazaqstan musylmandary dinı basqarmasy janynan ashylǵan «Múftııat» baspasynan jyl saıyn 50-ge jýyq kitap shyǵady. Rýhanı-tanymdyq baǵytynda shyqqan kitaptarymyz myńdaǵan tırajben halyq arasynda taralýda. Búgin tanystyrylymy ótip jatqan «Islam jáne adal qoǵam» kitaby osy baǵyttaǵy jumysymyzdyń jalǵasy», - dedi Bas múftı.
Shara barysynda memleket jáne qoǵam qaıratkeri, professor, akademık Ǵarıfolla Esim, ál-Farabı atyndaǵy Qazaq ulttyq ýnıversıtetiniń professory, tarıh ǵylymdarynyń doktory, QR UǴA akademıgi Bereket Káribaev, memleket jáne qoǵam qaıratkeri, Astana memlekettik qyzmet haby Basqarýshy komıtetiniń tóraǵasy Álıhan Baımenov, Eýrazııa ulttyq ýnıversıtetiniń ǵalymy, fılologııa ǵylymdarynyń doktory, professor Serik Negımov quttyqtaý sóz sóıledi.
Aıta keteıik, QMDB dinı qyzmet aıasynda 2026 jyldy «Islam jáne adal qoǵam» dep jarııalaǵan bolatyn. Bul bastama qoǵamda adaldyq, ádildik, jaýapkershilik, eńbekqorlyq jáne otansúıgishtik sekildi qundylyqtardy keńinen nasıhattaýǵa baǵyttalǵan.
