Elordada meshit shákirtteri arasynda bilim saıysy ótti (FOTO+VIDEO)
Búgin QMDB Nur-Sultan ókildigine qarasty 12 meshit shákirtteri arasynda «Myńnan tulpar» atty bilim saıysy bolyp ótti. «Rahymqyzy Raısa» meshitiniń uıymdastyrýymen ótken bilim saıysynda Qazaqstan tarıhy, dástúr men dinge qatysty «1 000 suraq» kitapshasy boıynsha synaq tapsyryp, ár meshitten 3 shákirtten quralǵan 12 top qatysty.
Aldyn ala berilgen tapsyrma boıynsha úmitkerler «Sálem sózdiń anasy» aınalymy boıynsha ózderin tanystyryp ótse, «Ónerli órge júzer» aınalymynda salt-dástúrge baılanysty qazaqı naqyshtaǵy ónerlerin pash etti. «Quran jáne tájýıd» aınalymynda qatysýshylar ózderiniń Quran jattaý qabiletin talastyrsa, «Júzden júırik» jáne «Doda» aınalymdarynda Paıǵambarymyz ben Sahabalar ómirine qatysty, Fıqh, Aqıda máselelerine baılanysty suraqtarǵa jaýap izdedi. Sondaı-aq, «Máre» aınalymynda qazaq halqynyń salt-dástúr, ádep-ǵurpyna baılanysty suraqtar da qatysýshylardyń bilimin jan-jaqty sarapqa saldy. Besinshi aınalymnan bastap upaı sany az top oıynnan shyǵarylyp, sońǵy «Myńnan tulpar» aınalymynda úsh top qana júldege talasty.
Úmitkerlerdiń bilim deńgeıin baǵalap, ádil tóreligin aıtý QMDB Sharıǵat jáne pátýa bóliminiń mamany Medet Qursaqov, «Astana» medresesiniń ustazy Berdibek Oıanǵan jáne №24 mekteptiń tarıh pániniń muǵalimi Ǵanı Arǵynbaevtarǵa tabystaldy. Komandalardyń jeti aınalym boıynsha jınaǵan upaı sany boıynsha «Myńnan tulpar» bilim saıysynyń bas júldesi «Rahymqyzy Raısa ana» meshitiniń «Raısa ana» toby ıelendi. Júldeli II oryn «Sheıh Kýnta qajy» meshitiniń «Qulager» tobyna buıyrsa, «Ál-Ǵanı» meshitiniń «Fırdaýs» toby III orynǵa taban tiredi. Júldeger komandalarǵa qarjylaı syılyq tabystalyp, ókildiktiń arnaıy «Alǵys hatymen» marapattaldy.
Aıtýly sharaǵa Nur-Sultan qalasynyń bas ımamy Erbolat Júsipov arnaıy qatysyp, bilim jolyndaǵy jetkinshekterge izgi tilegin bildirdi. Islam dinindegi bilim-ǵylymnyń mańyzdylyǵyn erekshe atap ótip, búgingideı bilim saıysynyń aldaǵy ýaqytta turaqty túrde ótkizilip turatynyn jetkizdi.
Sýretter toptamasyn «FOTOGALEREIa» aıdarynan kóre alasyzdar!
