Elordada qasapshylarǵa arnalǵan semınar ótti (FOTO)

Qasıetti Qurban aıt merekesi qarsańynda Nur-Sultan qalasyndaǵy «Ábý Nasyr ál-Farabı» meshitinde «Qasapshylyq – saýapty hám jaýapty is» atty semınar-trenıng bolyp ótti.  Semınarǵa bas shahardaǵy qurban shalatyn oryndarda qyzmet atqarýǵa tıisti azamattar qatysyp, tájirıbe jınaqtady.

Alqaly jıynǵa QMDB «Zeket jáne qaıyrymdylyq» qorynyń dırektory Qanat Qydyrmın, QMDB «Halal Damý» jáne veterınarlyq sanıtarııa isiniń mamany Danııar Safıev, QMDB «Zeket jáne qaıyrymdylyq» qorynyń Nur-Sultan qalasy boıynsha ókili Mereı Jaqııa syndy jaýapty mamandar shaqyrylyp, semınarǵa qatysýshy qasapshy azamattarǵa sharıǵat talaptaryna sáıkes mal soıýdyń jón-josyǵy túsindirildi.

Dáris barysynda qasapshylyq qylatyn azamattarǵa Qanat Qydyrmın arnaıy dáris júrgizip, qurban shalýdyń sharıǵı úkimderi men talap-sharttaryn keńinen túsindirse, Danııar Safıev halal standartqa saı mal baýyzdap, et óńdeý jóninde dáris oqydy. Semınar sońynda qatysýshylardyń suraqtaryna mamandar tarapynan naqty jaýaptar berildi.