Elordadaǵy «Sheıh Kýnta qajy» meshitine bas ımam taǵaıyndaldy (FOTO)

Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń buıryǵymen keshe el astanasyndaǵy «Sheıh Kýnta qajy» meshitine jańa bas ımam taǵaıyndaldy. Nur-Sultan qalasynyń bas ımamy Erbolat Júsipov bastaǵan top meshit jamaǵatymen júzdesip, Smataev Ibragım Keldibaıulyn tanystyryp qaıtty. Jańa taǵaıyndalǵan bas ımam qyzmetine sáttilik tilep, din jolynda jemisti eńbek atqarýǵa shaqyrdy.

Sondaı-aq, «Sheıh Kýnta qajy» meshitiniń bas ımamy qyzmetin atqaryp kelgen Erejepov Sábıtke ókildik atynan arnaıy alǵys bildirdi. Qyzmet atqarǵan eki jyldan astam ýaqyt ishinde eleýli eńbekterin atap ótip, aldaǵy jumysynda da saýapty isterge uıytqy bolýyna tileýlestik bildirdi.

Aıta keteıik, «Sheıh Kýnta qajy» meshitiniń bas ımamdyǵyna taǵaıyndalǵan Ibragım Keldibaıulynyń esimi elordalyq jamaǵatqa keńinen tanymal. Táýelsizdiktiń alǵashqy jyldarynda bastalǵan eńbek joly Aqmola oblysynyń birneshe aýyldarynda, Elorda meshitterinde («Tólebaı meshiti», «Nur Astana» meshiti) jalǵasqan Ibragım Keldibaıuly buǵan respýblıkalyq «Áziret Sultan» meshitinde naıb ımam qyzmetin atqaryp kelgen bolatyn.