Elordalyq áıel jamaǵatyna arnalǵan Máýlit keshi ótkizildi (FOTO+VIDEO)
Búgin QMDB-nyń Nasıhat jáne qoǵammen baılanys bóliminiń «Áıelder-qyzdar» sektory men «Nur Astana» meshitiniń janyndaǵy «Jibek» qyz-kelinshekter klýbynyń uıytqy bolýymen «Adamzattyń asyly Paıǵambarym Muhammed (ﷺ)» atty máýlit keshi ótkizildi.
Arnaıy is-sharaǵa «Nur Astana» meshitiniń naıb ımamy Ádilhan Serikbaı, ustaz Ilııas Otarov, «Sádýqas qajy Ǵylmanı» meshitiniń Bas ımamy Jumanazar Sadyrhanov, QMDB-nyń Áıel-qyzdar sektorynyń meńgerýshisi Aqbópe Qanatqyzy qatarly dindar qaýym ókilderi, Astana qalasy Din problemalaryn zertteý ortalyǵy Ońaltý bóliminiń basshysy, psıholog Lımana Qoıshıeva, L.N.Gýmılev atyndaǵy EUÝ-dyń Fılosofııa kafedrasynyń meńgerýshisi Tolǵanaı Mýstafına, tanymal ánshi Altynaı Jorabaeva, aıtys aqyny Sara Toqtamysova syndy óner adamdary, «Jan jylýy» baǵdarlamasynyń jýrnalısti Aqbaıan Saparbaeva, «Orda» ǴM radıosynyń jýrnalısti Maıra Tólepbergen jáne BAQ ókilderi qatysty.
Naıb ımam Ádilhan Serikbaı, Áıel-qyzdar sektorynyń meńgerýshisi Aqbópe Qanatqyzy, psıholog maman Lımana Qoıshıeva quttyqtaý sóz sóılep, atalǵan sharanyń mán-mańyzyna toqtalyp, jınalǵan jurtshylyqty merekemen quttyqtady.
Merekelik baǵdarlama aıasynda elimizge tanymal qarı, «Sádýqas qajy Ǵylmanı» meshitiniń Bas ımamy Jumanazar Sadyrhanov Máýlit oqydy, jınalǵan jurtshylyq eki dúnıe sardary Paıǵambarymyzǵa (ﷺ) salaýat sálemder joldady. Ájeler toby «Salaýat» oryndady. Óner akademııasynyń stýdentteri men «Jibek» qyz-kelinshekter klýbynyń músheleri arnaıy daıyndaǵan «Sabyrlyq ımandylyqtyń shyńy» atty qoıylymy sharaǵa qatysýshy ájelerdiń kóńilderinen shyǵyp, kózderine jas uıalatty.
Osylaısha, Arqa tósindegi aıshyqty qalada este qalarlyqtaı Máýlit merekesi ótti.
