EŃBEK KÚNI QUTTY BOLSYN!
Asa qamqor, erekshe meıirimdi Alla Taǵalanyń atymen bastaımyn!
Elimiz boıynsha erekshe qurmetpen atalyp ótiletin 24 qyrkúıek – Eńbek kúnimen barsha otandastarymyzdy shyn júrekten quttyqtaımyn!
Ejelden «eńbektiń nany tátti» dep, urpaǵyn jatypisher jalqaýlyqtan, «erteńi» bitpeıtin erinshektikten, aramtamaqtyq pen masyldyqtan tyıyp tárbıelegen halqymyz úshin búgingi kúnniń taǵylymy mol ekeni sózsiz. Tipti, «er dáýleti – eńbek» dep, baılyqty basqadan emes, adal eńbekten izdeý kerektigin úıretken halqymyz úshin Eńbek kúni – erekshe meıram, ulttyq sanadaǵy saf asyldardyń jańǵyratyn kúni. Óıtkeni, eńbek taqyryby – barsha adamzat balasyn alǵa jetelegen, damý men órkendeýdiń ózegi bolǵan sala.
Qasıetti kitabymyz Qurannyń kóptegen aıattarynda musylmandardy eńbek etýge mindetteıdi. Allanyń bizge bergen rızyq-nesibesine eńbek etip jetýdi mindetteýiniń hıkmeti de – ǵıbadat bolýynda. Ardaqty paıǵambarymyz Muhammed (oǵan Allanyń salaýaty men sálemi bolsyn) bir hadısinde bul jaıynda: «Amaldardyń eń abzaly – adal kásip», – dep aıtqan. Synaq ǵumyrda mańdaı terin tógip, tirshiliktiń qamyn jasap, otbasyn baǵý da – qulshylyq. «Eńbegimen er syıly» demekshi, musylman úshin ózin jáne otbasyn asyraý, adal eńbekpen nan tabýy – ǵıbadattyń bir túri.
Ata-babamyz keń baıtaq jerdi bizderge mura etip qaldyrdy. Alla Taǵala mańdaıymyzǵa asty men ústi baılyqqa toly atameken jazǵan eken. Jaratqannyń bizge bólip bergen bul ıgiligin tıimdi paıdalaný úshin qajetti mamandyqtardy ıgerip, eńbek etý kerek. Endigi kezek – elimizdiń árbir azamatynyń qolynda. Memleket basshysy Qasym-Jomart Toqaev ta búgingi quttyqtaýynda «óz isiniń maıtalmandary qashanda qoǵamnyń nazarynda bolýǵa tıis» dep, shynaıy eńbek adamdaryna úlken úmitin bildirdi.
Osy oraıda «Sen de bir kirpish, dúnıege ketigin tap ta, bar, qalan!» degen Abaı atamyzdyń ósıetine saı, Otanymyzdyń tıtteı bolsa da bir tetigin bútindeýge adal eńbegimizben atsalysýymyz qajet!
Erbolat Júsipov
Astana qalasynyń jáne
«Áziret Sultan» meshitiniń Bas ımamy
Источник: Aidos
