EŃBEK – YRYSTYŃ QAZYǴY

Qurmetti halaıyq!

Barshańyzdy búgingi Eńbek kúnimen shyn júrekten quttyqtaımyn! Otbasylaryńyzǵa amandyq, mol tabys, baqyt pen bereke tileımin.

Islam dini musylman balasyn adal eńbek etip, Allanyń násip etken rızyq-nesibesin jınaýǵa tárbıeleıdi.

Qasıetti Quranda: «Namazdy oqyp bolǵannan soń jer betine tarap, Allanyń nyǵmetinen ózderińe yryzdyq-nesibe izdeńder. Allany kóp eske alyńdar, tabysqa jetersińder» («Juma» súresi, 10-aıat) dep ámir etken.

Paıǵambarymyz Muhammed (oǵan Allanyń salaýaty men sálemi bolsyn): «Senderdiń bireýleriń qolyna jip alyp, daladan qushaq otyn arqalap ákelip, sol arqyly Allanyń qalaýymen kún keshkeni adamdardan qaıyr suraǵanynan áldeqaıda jaqsy» dep eńbek etýge shaqyrǵan.

Hakim Abaı «Eńbek etseń erinbeı, toıady qarnyń tilenbeı» dep, eńbek etýge, adal tabys tabýǵa ósıet etken. 

Shákárim atamyz «Adamnyń jaqsy ómir súrýine úsh sapa anyq bola alady. Olar – barlyǵynan basym bolatyn adal eńbek, minsiz aqyl, taza júrek. Bul sapalar adamdy dúnıege kelgen kúnnen bastap tárbıeleıdi», – deıdi.

Islam dini masyldyqqa salynýdy quptamaıdy. Adam atadan (Allanyń oǵan sálemi bolsyn) bastap barlyq paıǵambarlar Alla Taǵalaǵa ǵıbadat etýmen qatar egin egip, qoı baǵyp, temir ustasy bolyp, kúnkóris úshin qural-saıman jasap eńbektengeni barshamyzǵa aıan. Qaıyr tilep, ómir súrý – naǵyz uıat is. Alla Taǵala aqyl, sana, densaýlyq, jiger bergesin adam óz bala-shaǵasyn adal tabysymen asyraýǵa qamdanýy kerek.

Alla Taǵala barshamyzǵa adal eńbek etip, mol tabysqa jetip, eki dúnıe ıgiligine kenelýdi násip etkeı. Ámın!

Naýryzbaı qajy TAǴANULY
QMDB Tóraǵasy, Bas múftı