Ershat Aǵybaıuly Qordaı aýdanynyń dinı ahýalymen tanysty (FOTO)

QMDB Tóraǵasynyń orynbasary, naıb múftı Ershat Aǵybaıuly arnaıy is-saparmen Jambyl oblysy Qordaı aýdanyna keldi.

Naıb múftıdiń jumys barysy áýeli Qordaı aýdanynyń ákimi Rústem Rysbaıulymen kezdesýden bastaldy. Jıynǵa Jambyl oblysynyń bas ımamy Beıbit Myrzageldıev, oblystyq Din isteri basqarmasynyń basshysy Jangeldi Omarov pen aýdannyń bas ımamy Asqar Zákirjanuly qatysty. Azamattar Qordaı óńiriniń dinı ahýaly, tynys-tirshiligi jóninde suhbattasyp, pikir almasty. Birqatar mańyzdy máselelerdi talqylaýdan ótkizdi.

Budan soń naıb múftı oblys ákimi Berdibek Saparbaevtyń bastamasymen «Beıbitshilik jáne kelisim» jobasy aıasynda aýdanyndaǵy jumys tobymen birqatar kezdesýler ótkizdi. «Sizderge Bas múftı Naýryzbaı qajy Taǵanulynyń arnaıy sálemdemesin jetkizýge ruqsat etińizder. Musylman qaýymynyń beıbitsúıgishtiginiń bir dáleli olardyń amandasý sózinen bastalady. Árbir qazaq azamatynyń «Ássálámýaǵaleıkúm» dep, oń qolyn keýde tusyna aparyp ıilip jatýy – bilgen adamǵa qundy ónege, jaqsy qasıet. Iaǵnı ol aldynan shyqqan zamandasyna «Sizge Allanyń amandyǵyn, beıbitshiligin tileımin» dep, yqylasyn bildirip tur. Sondyqtan da osy bir aýyz sálemniń ózi – asyl dinimizdiń beıbitshilikti tolyq qoldaıtynyn, adamdardy yntymaq pen birlikke, ymyraǵa bastaıtynynyń úlken dáleli», – dedi Ershat Aǵybaıuly.

Jıynnan soń naıb múftı Qordaı aýdanyna qarasty 62 meshittiń ımam-moldalarymen májilis ótkizdi. Basqosý barysynda barlyq sanıtarlyq talaptar saqtaldy.