«ǴYLMANI» MEShITINDE ShÁKÁRIM QAJYNYŃ DINI EŃBEKTERI TANYSTYRYLDY (FOTO)
Azamattardy jat aǵymnan saqtandyrý, ásire dinshildik pen teris tanymdarǵa jol bermeýdegi qazaq halqynyń san ǵasyrlyq tarıhı tól tájirıbesiniń mańyzy aıyryqsha. Ásirese taıaý zamanǵy tarıhymyzda Abaı mektebinen nár alǵan ǵulamalardyń eńbegin elemeı ketýge bolmaıdy.
Búgingi din san alýandyq aıasynda ulttyq biregeılikti saqtap qalý máselesinde, Abaı shákirti, kórnekti Alash qaıratkeri, ǵulama ǵalym, iri oıshyl, din bilgiri Shákárim qajy Qudaıberdiulynyń «Musylmandyq sharty», «Úsh anyq» eńbekteriniń alatyn orny orasan.
Quptan namazynan keıinge oraılastyrylǵan is-sharada qazaq topyraǵyndaǵy qaıratkerlerdiń dinı tanymyn saralap, abaıtaný jolynda talaptanyp júrgen jýrnalıst Orazbek Saparhan jınalǵan kópshilikke atalmysh eki eńbek týraly maǵlumat berdi.
Orazbek Saparhan bul eńbekterdiń qazaq qoǵamynda qalyptasqan kúrdeli dinı ahýaldardy retteýdegi mańyzyna toqtalyp, kitaptyń tanymdyq, mazmundyq, stıldik erekshelikterin ashyp aıta otyryp, «Musylmandyq sharty» eńbeginiń qazaq halqynyń turmys-tirshiligine baılanysyn, oı júıriktigin, dinı shablondardan ada aıyryqsha sıpatyn atap ótti. Basqa halyqtardyń mádenıeti men oılaý júıesinen ada qazaqy tanym men oılaý júıesi negizinde jazylǵan eńbekterdiń búgingi Qazaqstandaǵy musylmandardyń dinde shekten shyqpaýyna, jat aǵymnyń jeteginde ketpeýine, tipti túsinýge ońaı, ıgerýge ıkemdi mazmundyq erekshelikterin eskermeýge bolmaıtynyn tilge tıek etip, «Musylmandyq shartynyń» meshit-medreselerde oqýlyq bolýǵa suranyp turǵan eńbek ekenin jetkizdi.
Rýhanı sharadan mol maǵlumat alǵan jamaǵat meshit bastamasyna dán rızashylyǵyn bildirdi.
