IH Respýblıkalyq qarılar baıqaýynyń jerebesi tartyldy (FOTO+VIDEO)

Búgin eloradadaǵy «Aqmeshit» meshitinde IH respýblıkalyq «Quran Kárimdi jatqa jáne mánerlep oqý» qarılar baıqaýynyń jerebe tartý rásimi ótti.

Eki kúnge jalǵasatyn baıqaýǵa elimizdiń túkpir-túkpirinen 72 úmitker qatysqaly otyr. Aımaqtyq irikteý kezeńderinen oq boıy oza shapqan saıyskerler 4 atalym, ıaǵnı, Quran Kárimniń 10, 20 jáne 30 parasyn jatqa oqý, sondaı-aq, mánerlep oqý boıynsha baq synamaq. Al búgingi rásim barysynda úmitkerlerdiń rettik nómiri belgili boldy.

Respýblıkalyq «Áziret Sultan» meshitinde ótetin qarılar baıqaýy elimizdegi pandemııaǵa baılanysty saqtyq sharalaryn saqtaı otyryp ótedi jáne jalpy jurtshylyqqa «Hıkmet» stýdııasynyń YouTube-arnasynan, «Halyq Arna» telearnasy, sonymen birge Múftııattyń Instagram-daǵy resmı paraqshasynan tikeleı kórsetilim usynylady.

Jerebe tartý rásiminde úmitkerlerge jarys uıymdastyrýshylary, pandemııaǵa baılanysty baıqaýdyń qalaı ótetinin baıandap, saqtyq sharalaryn eskerýdi surady. Sondaı-aq ár atalym boıynsha saıys kezinde zalda basqa atalym boıynsha jarysqa shyǵatyn úmitkerler otyrmaıtyny eskertildi.

Rásim sońynda baıqaýǵa qatysýshylarǵa sáttilik tilep, duǵa jasaldy.