ILIIaS HAJRI: QURANMEN «DOS BOLǴAN» JETISTIKKE JETEDI
Qazaqstan musylmandary dinı basqarmasynyń uıymdastyrýymen Qazaqstan Respýblıkasynyń ulttyq merekesi – Respýblıka kúnine oraı ótken I halyqaralyq Quran jarysynda jeńimpaz atanǵan marokkolyq qarı Ilııas Hajrı «Munara» gazetine bergen jedel suhbatynda osylaı dedi.
«Qazaqstanǵa kelgenime óte qýanyshtymyn. Osyndaı halyqaralyq jarysta baq synaǵanym úshin Allaǵa sansyz shúkir aıtamyn. Jarysty uıymdastyrýshylarǵa alǵysym sheksiz. Men týǵan jerim Marokkonyń bir meshitinde ımamdyq qyzmettemin jáne medresede ustazbyn. Marokkoda 1,5 mıllıonǵa jýyq Quran jattaǵan qarı bar. Halyqaralyq Quran jarystaryna marokkolyq qarılar jıi qatysady. Bizde qarılyqqa baýlý balabaqshadan bastalady. Meni de anam 4 jastan bastap Quran ǵa qyzyqtyrdy, keıin sońyna deıin jattap shyǵýyma ákem sebepker boldy. Bala bolyp oınadym, qurdastarymmen qatar oqydym, sportpen de aınalystym. Al Qurandy bos ýaqytymda jattadym. Qazirgi kezde jaqsylyqty jaıýdyń bir joly áleýmettik jeli ekeni ras. Barlyq áleýmettik jelini men de qoldanamyn. Ondaǵy maqsatym – adamdarǵa Qurandy tanytý, oǵan qyzyǵyp, úırenip, jattap júrgenderge qoldaý bildirý.
Osy jarysta baıqaǵanym, meshitke kelýshi jamaǵattyń Quranǵa degen yqylasy, mahabbaty erekshe eken. Qarılar shyqqanda olardy uıyp tyńdap, rýhanı áser alyp otyrdy. Shynynda, Quranǵa qurmet musylmandy jetistikke jeteleıdi. Onymen dos bolý tek qana jaqsylyqqa keneltedi. Dinnen bólek, basqa salalarda da bilim alyp kórdim. Sonda baıqaǵanym, ózge salany da tez úırenip, jyldam jattap alatyn boldym. Bul da Alla Taǵalanyń bergen jeńildigi dep túsinemin. Qazaqstandyq baýyrlarymyzdy da Qurandy qurmetteýge, ony úırenip, jattap, sońyna deıin jetkizýge shaqyramyn. Jaratqan Iemiz jaqsylyǵyn násip etsin!» deıdi jarystyń bas júlde ıegeri Ilııas Hajrı.
