IMAMDAR FORÝMYNYŃ ÚNDEÝI QABYLDANDY (FOTO)
Búgin Astana qalasynda Qazaqstan musylmandary dinı basqarmasynyń uıymdastyrýymen «Imam – izgi qoǵam jarshysy» taqyrybynda ótken V respýblıkalyq ımamdar forýmynyń úndeýi qabyldandy. Úndeýdi QMDB Ýaǵyz-nasıhat bóliminiń meńgerýshisi Batyrjan Mansurov oqyp berdi.
«Biz, din jáne qoǵam qaıratkerleri, zııaly qaýym ókilderi, Qazaqstan musylmandary dinı basqarmasy janyndaǵy Ǵulamalar keńesiniń músheleri, «Imam – izgi qoǵam jarshysy» V Respýblıkalyq ımamdar forýmynyń qatysýshylary forýmda qabyldanǵan «Qazaqstan musylmandary dinı basqarmasynyń rýhanı (dinı jáne ulttyq) qundylyqtardy nasıhattaýdaǵy róli», «Imamnyń jamaǵat namazyn ótkizý tártibi», «Qajynyń rýhanı kelbeti» qujattaryn biraýyzdan qoldaımyz.
Forýmda qabyldanǵan qujattardy yjdahattylyqpen el arasynda, jamaǵat ishinde nasıhattaý asa mańyzdy is dep sanaımyz. Dinı jáne ulttyq qundylyqtardy dáripteýde, dinı qulshylyqtardy sharıǵat talabyna saı atqarý isinde, dinı rásimderdi birizdilikpen ótkizýde din qyzmetkerleriniń róli men jaýapkershiligi asa zor dep bilemiz. Osy rette tómendegideı usynystardy qoldaýǵa úndeımiz:
Birinshiden, ata-babalarymyzdan kele jatqan dinı jáne ulttyq qundylyqtardy el arasynda belsendi túrde nasıhattaýǵa.
Ekinshiden, Qazaqstan musylmandary dinı basqarmasyna qarasty barlyq meshitterde bes ýaqyt namaz, eki aıt, qasıetti juma jáne taraýyq namazy syndy qulshylyqtardy birizdilikpen ótkizýge, jamaǵat arasynda túsinispeýshilikke jol bermeýge jáne babalar salǵan dinı mektepti damytýǵa.
Úshinshiden, bes paryzdyń biri qajylyq qulshylyǵyn ótep kelgen otandastarymyzdy qoǵamda kórkem minezimen, ónegeli isterimen úlgi kórsetýge jáne qajy degen qurmetke laıyqty bolýǵa shaqyramyz» delingen úndeýde.
Aıta keteıik, forýmǵa Qazaqstan Respýblıkasynyń Memlekettik keńesshisi Erlan Qarın, Aqparat jáne qoǵamdyq damý mınıstri Darhan Qydyráli, Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly, Ǵulamalar, Sarapshylar keńesiniń músheleri, medrese-kolledj ben qarılar ortalyǵynyń dırektorlary, sondaı-aq elimizdiń ár aımaǵynan kelgen 350 ımam qatysty.
