«Imanǵalı» meshitiniń amin.kz saıty iske qosyldy (FOTO)
Atyraýda Qazaqstan musylmandary dinı basqarmasynyń Atyraý oblysy boıynsha ókildigi, «Imanǵalı» ortalyq meshitiniń amin.kz resmı saıtynyń tanystyrylymy ótti.
Atyraý qalasyna qarasty meshit ımamdary, blogerlerdiń qatysýymen ótken sharada Atyraý oblysynyń Bas ımamy Altynbek Utyshanuly aqparattyq, tanymdyq baǵyttaǵy rýhanı saıttyń erekshelikterimen tanystyryp ótti.
«Basty erekshelik – saıt túrli aıdarlardy jınaqtap otyr. Bas múftı baǵany, bas ımam baǵany, jańalyqtar, maqalalar, suhbattar, ǵıbratty áńgimeler, suraq-jaýap bólimimen birge, «Onlaın dárister» jobasy iske qosylyp otyr. Bul aıdarda bilikti mamandardyń tápsir taqyryby boıynsha sabaqtary maqala túrinde berilip otyrady. Iaǵnı, bul – saıt arqyly turaqty sabaq alýǵa múmkindik bar degen sóz.
Fotogalereıa aıdarynda meshit, óńirimizdiń rýhanı ómirinen fotosıýjetter berilip otyrsa, vıdeogalereıa negizinen Hıkmet.tv arnasynyń jáne ortalyq «Imanǵalı» meshitiniń beıneónimderimen jańartylyp turady.
Bizdiń maqsatymyz – dinge qyzyǵýshylyq tanytqan ınternet qoldanýshylaryn meıilinshe shynaıy, sapaly aqparat kózimen qamtamasyz etý», – deıdi Atyraý oblysynyń Bas ımamy Altynbek Utyshanuly.
Bas ımam óz sózinde jahandaný dáýirinde aqparattyq keńistiktiń máni zor ekendigin atap ótti.
Taǵy bir ereksheligi, saıt táýligine 24 saǵat jańartylyp turady. Ári saıtta din men dástúr sabaqtastyǵy aıqyn kórinis taýyp otyr. Sondaı-aq uǵan deıin meshit jańalyqtary jarııalanyp kelgen «islam-atyrau.kz» saıtynyń domeni endi jabyldy.
