Iraktan oralǵan sábılerdiń jaǵdaıy túzelip keledi
Nur-Sultan qalasynyń qıyn jaǵdaıǵa tap bolǵan balalardy qoldaý ortalyǵynyń dırektory Bıbigúl Takısova Iraktan jetkizilgen balalardy beıimdeý jumystary qalaı júrip jatqanyn aıtty.
«Balalar bastapqyda bul jerge kelgen kezde jylaýyq, qorqaq bolatyn. Qazir balalar birshama beıimdelip qaldy, kóńilderi kóterildi. Olarmen psıhologtar, áleýmettik qyzmetkerler, tárbıeshiler jumys istep jatyr. Balalardyń jaǵdaıy jaqsy, tuıyq, buıyǵy bolýdan aryldy. Alǵashynda kishkentaılary eresekterine jabysyp alatyn. Al qazir tárbıeshilerdi qushaqtaıdy, súıedi, erkin aralasa alady», — dedi ol.
Ortalyq basshysy balalar kúndiz oıynǵa aldanǵanymen túnde uıyqtar aldynda analaryn izdeıtindigin aıtady. «Kúndiz oıynnyń qyzyǵyna beriletindikten analaryn izdeı qoımaıdy. Al túnde analaryn eske alady. Biz olardy jubatyp, analarynyń jaqyn arada keletindigin aıtyp aldaýsyratamyz», — dedi B.Takısova.
Ortalyqtaǵy psıholog maman Aıbek Qylyshbek te balalardyń alǵash kelgen kezde tuıyq bolǵandyǵyn aıtty.
«Eń alǵash kelgende balalar bir-birimen ajyramaıtyn. Bólekteı bastasań jylaıtyn. Al qazir bir-birinen ajyratsań da ózderin jaıly sezinedi. Bastapqy kezde balalar sýret salǵanda kúńgirt tústerdi qoldansa, qazir túrli-túske áýestenip keledi. Bir baıqaǵanym, balalar shatyry joq úıler salatyn. Al bul Irakqa tán dúnıe. Qazir «Báıterekti» jáne basqa da túrli-tústi sýretter salady», — dedi ol.
