«Halal Damý» «Magnum» qyzmetkerlerine semınar ótkizdi (FOTO)
Elordada QMDB-ǵa qarasty «Halal Damý» mekemesiniń uıymdastyrýymen elimizdegi iri saýda oryndarynyń biri – «Magnum Cash & Carry» sýpermarket, gıpermarket jáne shaǵyn formattaǵy dúkender jelisi qyzmetkerlerine «Adal as» taqyrybynda onlaın jáne oflaın formatta oqý-semınary ótti.
«Halal Damý» dırektory Aıbek Asqarbekulynyń tóraǵalyǵymen ótken semınarǵa Sharıǵat jáne pátýa bóliminiń mamany Medet Qurmashuly, sanıtarlyq veterınarııa isiniń mamany, tehnolog Danııar Safıev, elimizdiń 10 iri qalasyndaǵy «Magnum»-nyń 100-ge jýyq qyzmetkeri men jergilikti ınspektor-kontroler mamandar qatysty.
«Magnum Cash & Carry» – serpindi damyp kele jatqan elimizdegi eń iri saýda jelisi. Atalǵan saýda oryndarynda halal ónimderdiń keń assortımenti usynylǵandyqtan halal ónimderdi jetkizý, qabyldaý, saqtaý, daıyndaý jáne satý protsesinde standarttyń barlyq talaptary qatań oryndalyp, tehnologııalyq tizbek tolyqtaı saqtalýy tıis. Osy oraıda revızorlyq tekseris sharalarynan bólek, et qoımasy men et óńdeý, satý oryndaryndaǵy qyzmetkerlerge sharıǵat jáne halal standartynyń mańyzy, talaptary men erekshelikteri jóninde oqý-semınar sharalary, kásibı biliktilikti arttyrý jobalary júrgizilýi tıis. 100-ge jýyq et satý jáne óńdeý oryndaryndaǵy qyzmetkerler qatysqan semınarda «Halal Damýdyń» jumys barysy, standarttaýdan bastap sertıfıkat tabystaýǵa deıingi kezeńderi tanystyryldy. Sharıǵat mamany Medet Qurmashuly ıslam ádebine saı mal soıyp, et óńdeýdiń tártibi men mindetti jóninde baıandama jasasa, Danııar Safıev etke qoıylatyn veterınarlyq, sanıtarlyq talaptardy túsindirdi. Semınar sońynda qatysýshylar suraqtaryna, kásibı mamandar tarapynan jaýap berildi», – degen Aıbek Asqarbekuly atalmysh semınardyń joǵary deńgeıde ótkenin málimdedi.
Aıta keteıik, búginde «Magnum» saýda jelilerindegi et jáne shujyq satatyn oryndardy «QMDB HALAL» standartyna sáıkes sertıfıkattaý úshin qajetti jumystar áli de jalǵasýda.
