«HALAL DAMÝ» MAMANDARYNA ARNALǴAN RESPÝBLIKALYQ SEMINAR ÓTTI
QMDB tóraǵasy Bas múftı Naýryzbaı qajy Taǵanulynyń tapsyrmasymen respýblıka boıynsha halal baǵytyna jaýapty baqylaýshy ókilder men tehnolog mamandarǵa arnalǵan semınar jáne praktıkalyq is-tájirıbe uıymdastyryldy.
QMDB Tóraǵasynyń orynbasary, naıb múftı Ershat Aǵybaıulynyń jetekshiligimen ótken semınarǵa «Halal Damý» dırektory Aıbek Asqarbekuly, Ulttyq akkredıtteý ortalyǵynyń departament dırektory Almat Orynǵalıuly, Astana qalalyq sanıtarlyq-Epıdemıologııalyq baqylaý departamentiniń bólim basshysy Qarlyǵash Túıteqyzy qatysty.
«Bas múftı Naýryzbaı qajy Taǵanuly jyl saıynǵy baǵdarlyq baıandamasynda halal baǵyty boıynsha birqatar aýqymdy jobalar men mańyzdy sharalardy bekitip, tolyqqandy oryndalýyn tapsyryp keledi. Sondyqtan da, halal salasyndaǵy ortaq maqsat pen múddelerdi birlese júzege asyrýda búgingi jınymyzdyń mańyzy zor dep esepteımin», – degen Ershat Aǵybaıuly kásipkerler men tutynýshylarǵa halal sertıfıkattyń musylman qaýymynyń senimi men halyqtyń amanatyn arqalaıtyn qujat ekendigin aıtty.
Sonymen qatar, semınarda akkredıtteý jáne onyń tıimdiligi, qoǵamdyq tamaqtaný oryndaryna qoıylatyn sanıtarlyq talaptar jóninde keńinen túsindirildi. Jáne de, qatysýshylar halal standarttaý júıesi men tártibi, azyq-túlik qaýipsizdigi, et jáne sút ónimderine qoıylatyn veterınarlyq talaptar, halal dárilik zattar men profılaktıkalyq ónimderdi saqtaýǵa, tasymaldaýǵa, satýǵa qoıylatyn jalpy talaptar jóninde dáris tyńdady.
Aıta keteıik, eki kúnge sozylatyn semınar teorııalyq jáne praktıkalyq bólimnen turady. Oblystyq ókilder alǵan bilimderin birden is-tájirıbege qoldanyp, túrli baǵytta kásiporyn óndirismen tanysady.
