«Halal Damý» ortalyǵynda «Happy cake» qyzmetkerlerine semınar ótti (FOTO)
Elordada «Halal Damýdyń» oqý jáne bilim jetildirý ortalyǵynda «Happy cake» kásiporny qyzmetkerlerine arnalǵan oqý-semınar ótti.
Elimizdiń birqatar óńirlerindegi «Happy cake» tátti ónimderi «QMDB halal» standarty boıynsha sertıfıkattalǵan. Halalǵa erekshe den qoıǵan, úzdiksiz damý men jetilýdi maqsat tutqan «Happy cake» qyzmetkerleri «Halal Damý» oqý jáne bilim jetildirý ortalyǵyna jınalyp dáris tyńdady. Qyzmetkerlerge halal ónim óndirý tehnologııasy, ónimderge qosylatyn taǵamdyq qospalar, halal kondıterlik azyqtardy daıyndaýdaǵy erekshelikter, tutynýshylarǵa halal as usynýdyń mańyzdylyǵy, «QMDB halal» sertıfıkatynyń maqsaty men jaýapkershiligi jóninde dáris oqyldy. Dáristi «Halal Damý» dırektory Aıbek Asqarbekuly, tehnolog mamandar Aıjan Omarova, Danııar Safıev júrgizdi.
«Happy cake – jas bolsa da, jyldam damyp kele jatqan kásiporyn. Astyń adaldyǵy men ónimniń sapasyna, qyzmetkerlerdiń bilimin jetildirip, halaldyń mańyzdylyǵyn uǵynýǵa erekshe den qoıý – «halal» tańbasynyń júgin tereń túsingenderińizdiń belgisi. Biz sertıfıkattaǵan kásiporyndardy árdaıym qoldap, oqý-semınar sharalaryn ótkizip, qyzmetkerler bilimin jetildirý jolynda járdemdesýge daıynbyz», – dep semınardy bastaǵan Aıbek Asqarbekuly «Halal Damý» uıymynyń maqsaty men mıssııasy, sertıfıkattaý men sertıfıkattyń mańyzdylyǵy, baqylaý-qadaǵalaý sharalary men tutynýshylar senimi men talaby jóninde sóz qozǵady.
Semınardy ary qaraı jalǵastyrǵan mamandar halal týrasyndaǵy tyń aqparattarmen bólisip, qatysýshylar suraqtaryna jaýap berdi. Óz kezeginde, «Happy cake» qyzmetkerleri «Halal Damý» mamandaryna alǵysyn bildirip, osyndaı sharalardy jıi ótkizip turýdy surady.
