Halal taqyrybyndaǵy saýaldarǵa jaýap berdi (FOTO)

Búgin QMDB-nyń Dinı aqparat berý ortalyǵynda «Call-ortalyqtaǵy suraq jaýap» aıdarynyń kezekti Efıri ótti.

QMDB-nyń Instagram-daǵy paraqshasynda ótken tikeleı Efırde «Halal damý» dırektory Aıbek Atashev qonaq bolyp, oqyrman qaýymnyń suraqtaryna jaýap berdi. Búgingi Efır «Eńbek aptalyǵyna» oraı «Halal as – arqaýyń» taqyrybyna arnaldy. Saýaldarǵa alǵashynda telefon arqyly jaýap berilse, keıin tikeleı Efırge kelgen pikirlerge kezek usynyldy.

Bir saǵat ishinde halal taqyrybyna qatysty tolassyz kelgen suraqtarǵa Aıbek Asqarbekuly tushymdy jaýap berip, naqty aqparattarmen bólisip otyrdy. Máselen, «Halal marketter ashý josparda bar ma?» degen áleýmettik jeli qoldanýshysynyń saýalyna A.Asqarbekuly:

«Halal ónimderdiń bir ortalyqta satylýy búginde kópshiliktiń suranysyna ıe bolyp otyr. Sondaı-aq, Bas múftı Naýryzbaı qajy Taǵanulynyń bastamasymen atalmysh oryndardy ashý josparǵa engizilip, kún tártibine qoıyldy. Bul óz kezeginde asynyń adaldyǵyna basa mán beretin tutynýshylar úshin ıgi bastama bolmaq» dep jaýap berdi.

Oqyrman suraqtarynyń deni kúndelikti tutynatyn taǵam ónimderi jáne turmystyq zattarǵa qatysty bolýynyń ózi kópshiliktiń halal men haram máselesine beı-jaı qaramaıtynyn, bul taqyryptyń qazirgi tańda qanshalyqty ózekti ekenin anyq ańǵartty. Shujyq, et ónimderinen bastalǵan suraqtar legi sary maı, dári-dármek, tis pastasyna deıin jalǵasyp, saǵyz, Energetıkalyq sýsyndar, sporttyq taǵamdar tóńireginde támamdaldy.