KÓKShETAÝDA AIMAQTYQ AQSAQALDAR FORÝMY ÓTTI (FOTO)

Búgin Kókshetaý qalasynda Qazaqstan musylmandary dinı basqarmasynyń uıymdastyrýymen «Qarııalar – dástúrimniń qazyǵy» taqyrybynda aımaqtyq aqsaqaldar forýmy ótti. Igi basqosýǵa Bas múftı Naýryzbaı qajy Taǵanuly, zııaly qaýym ókilderi, Aqmola, Qaraǵandy, Qostanaı, Ulytaý, Soltústik Qazaqstan oblystaryndaǵy Aqsaqaldar keńesiniń músheleri qatysty.

Forýmda negizgi baıandama jasaǵan Naýryzbaı qajy Taǵanuly: «Shyn máninde keı jaǵdaıda din qyzmetkeriniń qaýqary jetpeıtin máseleniń sheshilýine qarııalarymyz oń úles qosýda. Biz osyǵan deıin el arasynda kórinis tapqan ysyrap pen sharıǵatymyz talap etpegen is-áreketterdi boldyrmaý maqsatynda ımamdardyń kezekti forýmynda «As berý mádenıeti», «Zırat jáne zııarat mádenıeti» qujattaryn qabyldadyq. Osy qujattarymyzdy el arasynda belsendi túrde nasıhattap, máseleni jiti túsindirip, Dinı basqarma bastamasyna qoldaý kórsetken qarııalarymyzdyń eńbegin erekshe atap ótkim keledi. Alla razy bolsyn! Aqmola oblysyndaǵy qarııalarymyz da qudaıy astarda ysyrapqa jol bermeý týraly bastamamyzǵa qoldaý kórsetti. Alla Taǵala qazynaly qarııalarymyzǵa kúsh-qýat násip etsin», – dedi.

Forýmda baıandama jasaǵan zııaly qaýym ókilderi áleýmettik jelide dombyrany, betashardy, kelinniń sálem salýyn haram dep sanaıtyn keıbir jas býyn ókilderine qarııalar da júıeli túsindirý jumystaryn júrgizý qajettigin atap ótti.

​