KÓKTAL MEShITINDE «MEN JASTARǴA SENEMIN» ATTY SEMINAR ÓTTI (FOTO)

Astana qalasy ókildigine qarasty Kóktal meshitinde QMDB «Jastar isi» sektorynyń meńgerýshisi Baǵjan Erbolatulynyń qatysýymen «Men jastarǵa senemin» atty semınar bolyp ótti.

Jıynǵa qulshylyq úıiniń bas ımamy Sábıt Erejepov pen ımam, ustazdar jáne meshit jamaǵaty qatysty. Basqosý barysynda babalar úmit artyp ketken búgingi jastardyń betalysy men rýhanı qarqyny, bilim kókjıegi men jetistikterge jetýge degen talpynysy sóz etilip, alǵa uly maqsattar qoıyp, el úshin, din úshin qyzmet etýdiń mán-mańyzy aıtyldy.

Ǵylym men tehnologııa damyǵan zamanda dini men dástúrin qatar ustana otyryp, ımanı ımmýnıtetti basty irgetas retinde qalap, jańashyldyqqa umtylý, ózgerister men syrttan keletin jaqsy da jaman faktorlarǵa jaýap bere alý, ózge eldiń artyqshylyqtaryn úırene otyryp, dinimiz men ádet-ǵurpymyzǵa jat dúnıelerden saqtaný máseleleri áńgime ózegine aınaldy.

Iá, Maǵjan sengen, keshegi babalar úmit artqan ult jastary qashanda birlik pen yntymaqta áreket ete otyryp, izgiler jolyn jalǵasa bosaǵasy berik el bolarymyz anyq.