Mádı Bápıulynyń «Quran Kárim» kitaby tabyldy

QR Táýelsizdigi Kúni qarsańynda Pavlodar qalasyndaǵy «Buqar jyraý atyndaǵy ádebıet jáne óner mýzeıinde" tabylǵan jádiger - kúresker aqyn, ánshi-kompozıtor Mádı Bápıulynyń ózi ustaǵan «Quran Kárim» kitabyn kópshilikke tanystyrý maqsatynda «Uly dala jańǵyryǵy» atty ádebı kesh ótti.

Mádı Bápıulynyń «Quran Kárim» kitaby jubaıy Dına ájemizdiń qolynda bolǵan, keıin ony baýyry Qabykeı Beısenulyna bergen, al ol adamnan ónertanýshy Aıtjan Bádelhan alǵan. Keshte Mádı Bápıuylynyń atalas týysy, aqyn, halyqaralyq «Alash» ádebı syılyǵynyń ıegeri Arman Qanı da boldy.

Qazaq halqynyń ulttyq rýhanı áleminde ózindik óshpes iz qaltyrǵan aqyn, ánshi-kompozıtor Mádı Bápıulynyń esimi qazaq mýzyka ónerinde Birjan sal, Aqan seri, Jaıaý Musa, Estaı, Balýan Sholaqpen qatar turatyn zor talant ıesi. Jalǵan aıyppen túrmege qamalyp, Atbasar, Qarqaraly, Semeı, Omby túrmelerinde otyrdy, 1916 jylǵy kóteriliske ún qosty, óziniń óleńderinde patsha úkimeti men jergilikti baı-shonjarlardyń júgensizdigin aıyptady.

Kesh barysynda aqynnyń foto-sýreti men beınesýreti kórsetilip, mýzeı qyzmetkeri, «Tekti sózdiń tóresi-terme» atty respýblıkalyq jyrshy-termeshiler baıqaýynyń júldegeri Orazbek Bahytqan Mádı Bápıulynyń «Qarqaraly» ánin oryndady.

Aqyn Mádı Bápıuylynyń Quran Kárim kitaby mýzeı qorynda saqtalady.