Mámbet Qoıgeldi: Imamdar Alash qozǵalysyna dem berdi (FOTO)

Almaty qalasynda ótken «QAZAQSTANDAǴY «DIN DÚRBELEŃI»: KEŃESTIK BILIKTIŃ DINGE QARSY REPRESSIIaLYQ ShARALARY» respýblıkalyq ǵylymı-tájirıbelik konferentsııasyna Abaı atyndaǵy Qazaq ulttyq pedagogıkalyq ýnıversıtetiniń professory, tarıh ǵylymdarynyń doktory, UǴA akademıgi Mámbet Qoıgeldi onlaın qatysyp, «Azattyq qozǵalystaǵy din men din qyzmetkerleriniń orny» taqyrybynda baıandama jasady.

«Din – kez-kelgen ulttyń mádenıetiniń qalqany, qorǵany. Patshalyq Reseı de, bolshevıkter de muny jaqsy bildi. Sóıtip dinge qarsy jumys istedi. Óıtkeni din jaıǵan ımamdardyń halyq arasyndaǵy bedeli óte joǵary boldy. Imamdar Alash qozǵalysyna da dem berdi. Máselen, Mirjaqyp Dýlatovtyń «Oıan, qazaq» kitabyna tyıym salynǵanda ımamdar ony meshitterde qoldan kóshirtip, taratty. Sol úshin de olar keıinnen qýdalandy» dedi Mámbet Qoıgeldi.

Tarıhshy baıandamasynda 30-jyldary ıshandar isi kóterilip, sopy operatsııasy júrgizilgenine arnaıy toqtaldy. Máselen, bolshevıkter Shaıanda meshit-medrese ustaǵan Appaq ıshandy qolǵa túsirip, túrmege qamap, ǵumyryn qıǵanyn, tipti ıshannyń úrim butaǵyna deıin qýdalaǵanyn aıta kelip, sopy operatsııasy arqyly kóptegen din qyzmetkerlerin aıaýsyz jazalaǵanyn atap ótti.