MEDRESE TÚLEKTERI BAS MÚFTI QOLYNAN DIPLOM ALDY
Elordadaǵy «Astana» medrese-kolledji bıylǵy túlekterine dıplom tabystady. Aıtýly is-sharaǵa QMDB Tóraǵasy, Bas múftı Naýryzbaı qajy Taǵanuly arnaıy qatysty. «Jolyń bolsyn, jas túlek» atty merekelik kesh qasıetti Quran aıattaryn oqýmen bastalyp, Bas múftı medrese shákirtterine izgi tilegin jetkizdi.
«Alla Taǵala qasıetti Quran aıatynda bilgender men bilmegender teń bola almaıtynyn baıandaǵan. Dinimizde bilim alýdyń mańyzy óte zor. Medresede alǵan ilimderińizdi jalǵastyramyn deseńizder elimizde múmkindik kóp. Sondyqtan árkez talmaı bilimge umtylyńyzdar. Din adamy árqashan eldiń birligin, jurttyń amandyǵyn oılaýy tıis. Sizderdiń minezińizge, tárbıeńizge, qyzmetińizge el razy bolsa, bul ustazdar eńbeginiń jemisi dep sanaımyn.
Osman ıbn Affan (Alla oǵan razy bolsyn) Paıǵambarymyzdan (oǵan Allanyń salaýaty men sálemi bolsyn) jetkizgen hadıste bylaı delingen: «Qııamet kúni úsh túrli adamǵa shapaǵat etiledi: Paıǵambarlar, sodan soń ǵulamalar, sodan soń sheıitter». Mine, bilim alýdyń qandaı mańyzdy ekenin osydan-aq ańǵarýǵa bolady» dedi Naýryzbaı qajy Taǵanuly.
Sondaı-aq Bas múftı óz sózinde Dinı basqarma medrese túlekterine qashan da qoldaý kórsete beretinin jetkizdi. Aıta ketsek, bıyl elimizdegi 9 medrese-kolledji 434 túlek bitirdi. Onyń 289-y er bala, 145-i qyz bala. 210 túlek buıryq alyp, qyzmetke ornalasýda. Nur Múbarak ýnıversıteti men Hýsamýdın as-Syǵanaqı ınstıtýtynda oqýyn jalǵastyrýǵa nıet tanytyp otyrǵan shákirtter de az emes. Al Astana medresesin bıyl 47 túlek bitirdi. Onyń 36-sy uldar, 16-sy qyz balalar.
«Astana» medrese-kolledji 2007 jyly ashylǵan bolatyn. Sodan beri medreseni jalpy 427 shákirt bitirip shyqty. Túlekterge dıplom berý sharasynda Bas múftı medreseden Qurandy tolyq jattaǵan jáne medresearalyq olımpıadada úzdik nátıje kórsetken shákirtterge bir rettik syıaqy tabystady.
