MEMLEKET BASShYSY DINI BASQARMANY 35 JYLDYǴYMEN QUTTYQTADY

Búgin Astana qalasynda Qazaqstan musylmandary dinı basqarmasynyń uıymdastyrýymen «Qazaq dalasyndaǵy dástúrli ıslam qundylyqtary» VI Respýblıkalyq ımamdar forýmyna Memleket basshysy Qasym-Jomart Kemeluly arnaıy quttyqtaý hatyn joldady. Prezıdentttiń quttyqtaý hatyn Qazaqstan Respýblıkasynyń Mádenıet jáne aqparat vıtse-mınıstri Qanat Jumabaıuly oqyp berdi.

«Qadirli qaýym! Barshańyzdy osy alqaly jıynnyń ashylýymen quttyqtaımyn!

Islam – ultymyzdyń ustyny, rýhanııatymyzdyń altyn dińgegi. Asyl dinimiz ǵasyrlar boıy halqymyzdyń jan dúnıesimen bite qaınasyp, ulttyń uıysýyna arqaý bolyp keledi. Dástúrli ıslam qundylyqtary – elimizde saltanat qurǵan yrysty yntymaqtyń qaınar kózi.

Búginde konfessııaaralyq tatýlyqtyń Qazaqstanǵa tán biregeı úlgisin búkil álem moıyndaıdy. Bıyl Astanada ótetin Dúnıejúzilik jáne dástúrli dinder lıderleriniń VIII sezi – osynyń aıqyn dáleli.

Azamattardyń ózara senimin nyǵaıtý jáne jaýapkershilik, janashyrlyq, ádildik sııaqty qaǵıdattardy ornyqtyrý – qashanda basty mindet. Bul rette qurylǵanyna bıyl 35 jyl tolǵan Qazaqstan musylmandary dinı basqarmasy mańyzdy ról atqarady.

Imamdar qoǵamdaǵy ıgi bastamalardy júzege asyrýǵa belsene qatysyp, jastardy jat dinı aǵymdardyń yqpalynan qorǵaýǵa, otanshyl urpaq tárbıeleýge tabysty túrde atsalysyp júr.               

Biz – ozyq oıly ult bolýǵa umtylǵan elmiz. Qazaqstannyń árbir turǵyny Adal azamatqa tán qasıetterdi boıǵa sińirý úshin tól qundylyqtarymyz ben ata dinimizge arqa súıeýdiń mán-mańyzy zor.

Búgingi basqosýda el birligin nyǵaıta túsetin salmaqty oılar men salıqaly pikirler aıtylady dep senemin.

Forým jumysyna sáttilik tileımin!» delingen Memleket basshysynyń quttyqtaý hatynda.

​