Múftııat Máýlit keshin uıymdastyrdy (FOTO)
Elordadaǵy respýblıkalyq «Áziret Sultan» meshitinde Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń qatysýymen rýhanı Máýlit keshi ótti.
Adamzattyń ardaqtysy Paıǵambarymyz Muhammedtiń (oǵan Allanyń salaýaty men sálemi bolsyn) dúnıege kelgen kúniniń qurmetine ótken rýhanı kesh «Hıkmet stýdııasy» YouTube-arnasynan, «Halyq Arna» telearnasynan jáne Múftııattyń Instagram-daǵy @muftiyatkz resmı paraqshasy arqyly tikeleı Efırden kórsetildi.
Aldymen Bas múftı Naýryzbaı qajy Taǵanuly el turǵyndaryn Máýlit merekesimen quttyqtap:
–Isi musylman balasy Paıǵambarymyzdyń (oǵan Allanyń salaýaty men sálemi bolsyn) týǵan aıyn asyǵa kútip, rýhanı basqosýlarda Allaǵa madaq, Paıǵambarǵa salaýat aıtady. Mundaı ıgi dástúr bizdiń elde de birneshe jyldan beri jalǵasyn taýyp keledi. Biz qazirgi álemdik pandemııa jaǵdaıyn eskere kele Máýlit keshin onlaın rejımde ótkizip, ıgi dástúrdi jalǵastyrýǵa sheshim qabyldadyq. Jaqsy amal jasaýǵa eshqandaı kedergi joq. Eń bastysy yqylas tanytyp, den qoısaq bolǵany.
Asyl dinimizde toılanatyn kez kelgen mereke izgilik pen qulshylyqqa, qaıyrymdylyq pen jaqsylyqqa úndeıdi. Alla elshisiniń dúnıege kelgen aıynda oryndalatyn amaldar musylman balasyn taqýalyqqa tárbıeleıdi.
Máýlit – otbasylyq mereke. Qasıetti Máýlit aıynda otbasymyzǵa ardaqty Paıǵambarymyzdyń (oǵan Allanyń salaýaty men sálemi bolsyn) ónegeli ómiri týraly nasıhat aıtyp, Alla elshisine salaýat joldap, qarııalarǵa qurmet kórsetip batasyn alý, balalarymyzdy qýanyshqa bóleý – merekeniń sáni men mánin arttyratyn saýapty amaldar, - dep atap ótti.
Budan keıin «Áziret Sultan» meshitiniń naıb ımamy, qarı Jumanazar Sadyrhanov, azanshy Erlan Bıtenov pen medrese shákirtteri Bárzánjı máýlitin oqyp, Paıǵambarymyzǵa (oǵan Allanyń salaýaty men sálemi bolsyn) sálem-salaýattar joldady.
Kesh qorytyndysynda Quran oqylyp, Bas múftı Naýryzbaı qajy Taǵanuly elimizdiń amandyǵy men tynyshtyǵy úshin duǵa jasady. Sondaı-aq Máýlit merekesi týraly jańa beınerolık kórermen nazaryna usynyldy.
