MÚFTIIaT QULSARYDA TASQYNNAN ZARDAP ShEKKEN OTBASYǴA ÚI SYILADY (FOTO)
Qazaqstan musylmandary dinı basqarmasynyń tóraǵasy Naýryzbaı qajy Taǵanulynyń bastamasymen «Qıyndyqta el birge» jobasy aıasynda sý tasqyny bolǵan Atyraý oblysy Qulsary qalasynyń turǵynyna baspana tabystaldy.
Bas múftı Naýryzbaı qajy Taǵanuly jaqynda sý tasqynynan zardap shekken Jylyoı aýdany Qulsary qalasyna arnaıy kelip jergilikti halyqpen júzdesip, qıyndyqta múftııat árqashan elmen birge ekendigin jetkizgen bolatyn. QMDB Tóraǵasynyń bastamasymen tabıǵı apattan zardap shekken turǵyndarǵa gýmanıtarlyq kómek te jetkizildi.
Sondaı-aq QMDB «Zeket jáne qaıyrymdylyq» qorynyń uıytqy bolýymen «El úlesi – páterge» jobasy aıasynda 757-baspana Aıgúl Bekesqyzy Orynbaevaǵa tabystaldy. Páter kiltin tabystaý úshin Qazaqstan musylmandary dinı basqarmasy tóraǵasynyń keńesshisi Kenjetaı Baıkemeluly arnaıy Qulsary qalasyna arnaıy bardy.
«Ózderińiz biletindeı, QMDB tóraǵasy Bas múftı Naýryzbaı qajy Taǵanuly óńirge sapary barysynda qıyndyqta elmen birge múftııat tarapynan barlyq kómekter kórsetiletinin aıtyp ketti. Búgin Allanyń qalaýymen, el-halyqtyń kómegimen «Qıyndyqta el birge» jobasy aıasynda berilip otyrǵan úshinshi baspanany tabystap otyrmyz. Elimiz aman, Alla Taǵala qaýipsiz, beıbit meken qylǵaı» dedi Kenjetaı Baıkemeluly.
Sondaı-aq, Bas múftı Naýryzbaı qajy Taǵanulynyń yqylasyn jetkize otyryp, múftııattyń qoldaýymen qıyn kezeńde halyqqa árdaıym demeý bildirip, kómek qolyn sozǵan eriktiler qatarynda eńbek etken Amanjol Serikuly men Anar Sansyzbaıqyzyna úlken qajylyqqa joldama tabystady.
Qulsary qalasy Jylyoı musylmandary meshitinde 100 adamǵa birinshi kezektegi azyq-túlikpen qaıyrymdylyq kómek kórsetti.
Eske sala ketsek, Qazaqstan musylmandary dinı basqarmasy «Zeket jáne qaıyrymdylyq qorynyń» uıymdastyrýymen birneshe márte elimizde sý basqan aımaqtarǵa gýmanıtarlyq kómek kórsetilgen bolatyn.
