Múftııattyń medıakeńistigi «MUNARA TV» telearnasymen tolyqty (FOTO)
Ózderińizge belgili, Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanulynyń bastamasymen elimizde jarııalanǵan pandemııalyq jaǵdaı kezinde «Halyq arna» telearnasy ashylǵan bolatyn.
Ózge salalardaǵy jumys júıesi men aqparat quraldarynyń qyzmeti onlaın rejımge ótken syndarly sátterde «Halyq arna» telearnasy halyqqa der kezinde qajetti aqparattar men ǵıbratty tanymdyq tele-ónimderdi usyndy.
Qazaqstan musylmandary dinı basqarmasy osyǵan deıin «Halyq arnanyń» quryltaıshylarymen yntymaqtasa otyryp, nátıjeli jumys atqardy. QMDB «Halyq arna» telearnasynyń quryltaıshylaryna aıryqsha alǵys bildiredi.
«OTAU TV» ulttyq jerseriktik televızııa jelisinde (49-ynshy arna) Qazaqstan musylmandary dinı basqarmasy bazasynda qurylǵan «MUNARA TV» respýblıkalyq rýhanı-aǵartýshylyq telearnasy ashylǵanyn qýanyshpen habarlaımyz. Budan bylaı Qazaqstan musylmandary dinı basqarmasynyń televızııa salasyndaǵy aqparattyq-nasıhat jumystary osy «MUNARA TV» telearnasy arqyly taratylady.
«MUNARA TV» halyqtyń dinı saýatyn arttyrýdy, jas kórermenderdiń boıyna ımandylyq, adamgershilik, patrıotızm syndy qundylyqtardy qalyptastyrýdy kózdeıdi. Sonymen qatar, telearna arqyly onlaın dárister uıymdastyrý josparlandy. Budan bólek ózekti máseleler tóńireginde suraqtarǵa tikeleı Efırde jaýap beriledi.
Ózderińizge belgili, Qazaqstan musylmandary dinı basqarmasynyń «MUNARA» respýblıkalyq rýhanı-tanymdyq gazeti bar. Endi Múftııattyń medıakeńistigi «MUNARA TV» telearnasymen tolyqty. Bolashaqta «MUNARA FM» rýhanı-tanymdyq radıosyn ashý josparda bar.
Aıta ketsek, Dinı basqarmanyń tól telearnasy men radıosyn ashý 2020-2025 strategııalyq damý baǵdarlamamyzda jazylǵan. Osy baǵytta Dinı basqarmanyń medıa salasyndaǵy jumys aýqymyn ulǵaıtýdy kózdep otyrmyz.
