MUFTYAT Medıa ortalyǵy ashyldy (FOTO)

QMDB Tóraǵasy Naýryzbaı qajy Taǵanulynyń bastamasymen Qazaqstan musylmandary dinı basqarmasy ǵımaratynan MUFTYAT medıa ortalyǵy ashyldy.

Ortalyqtyń ashylýyna Bas múftı Naýryzbaı qajy Taǵanuly, naıb múftı Ershat Ońǵarov, Apparat basshysy Ǵylymbek Jádigeruly, QMDB bólim basshylary men mamandary qatysty. MUFTYAT medıa ortalyǵynyń jumys barysyn Aqparat jáne qoǵammen baılanys bóliminiń meńgerýshisi Marat Bektazınov tanystyrdy.

Naýryzbaı qajy Taǵanuly: «Bul ortalyqtan Dinı basqarmanyń barlyq jańalyqtary daıyndalyp, oqyrmanǵa, kórermenge jol tartady. Ortalyq mamandary – óz isiniń saqa mamandary. Pandemııa kezinde Aqparat jáne qoǵammen baılanys bóliminiń jumysy jandandy. Onlaın sharalar qolǵa alynyp, jedel aqparat berildi. Sonyń arqasynda jurtshylyq shynaıy habarlar men málimdemelerdi oqyp-bilip otyrdy», - deı kele medıa ortalyq mamandarynyń qyzmetine sáttilik tiledi. Sondaı-aq QMDB Tóraǵasy medıa ortalyqty aralap, mamandardyń jumysymen tanysyp, naqty tapsyrmalar berdi.

Aıta keteıik, ortalyqta Aqparat jáne qoǵammen baılanys bólimine qarasty Ǵalamtormen jumys sektory, muftyat.kz saıty, «Hıkmet» stýdııasy, «Halyq arna» telearnasynyń elordadaǵy ókildiginiń mamandary qyzmet etedi. Ortalyq mamandary jedel ári shynaıy aqparat taratyp, din salasyndaǵy habarlardy elimizdiń oqyrmandaryna birinshi bolyp taratyp otyr. Sondaı-aq osy ortalyqtan ımam-ustazdardyń onlaın dáristeri men nasıhattary taralyp keledi.