Naıb múftı baspanasy órtengen turǵyndarmen kezdesti (FOTO)
30 qarasha kúni Almaty oblysy Talǵar aýdany Tóńkeris aýylynda Elektr togy saldarynan 8 páterli jeke úı órtenip, 34 adam baspanasyz qalǵan bolatyn.
Osy jaǵdaıdy estigen ımamdar men eriktiler kómek kórsetý sharalaryn shuǵyl túrde qolǵa aldy. QMDB Tóraǵasynyń orynbasary, naıb múftı Kenjeáli qajy Qońyratbaıuly Tóńkeris aýylyna baryp, tilsiz jaýdan zardap shekken turǵyndarmen kezdesip, Bas múftı Naýryzbaı qajy Taǵanulynyń sálemin jetkizdi. Sondaı-aq, olardy sabyrǵa shaqyryp, Alladan jeńildik tiledi.
«Elimizdiń musylman qaýymy otbasylaryńyzǵa duǵa jasap, Jaratýshynyń qalaýymen 3 kúnde 23 mıllıon teńge qarajat jınaldy. Osy ıgilikti istiń basynda júrgen eriktiler Edil Asyluly men Erkin Jasulanulyna alǵys bildirip, sol amanatty ózderińizge tabystaýǵa ruqsat etińizder. Alla Taǵala bul synaqtyń sońyn jaqsylyqqa, qýanyshqa ulastyrǵaı!» – dedi Kenjeáli qajy Qońyratbaıuly.
