Naıb múftı ǵylymı-praktıkalyq konferentsııaǵa qatysty (FOTO)

Almatydaǵy ál-Farabı atyndaǵy Qazaq ulttyq ýnıversıtetinde fılosofııa ǵylymdarynyń doktory, professor Orynbekov Muhanmadııar Serikbekulynyń 75 jyldyǵyna arnalǵan «DINTANÝDAǴY QAZIRGI ZAMAN TENDENTsIIaLARY. POSTNORMALDY KEZEŃ MÁSELELERI: ANTROPOLOGIIaLYQ DISKÝRS» halyqaralyq ǵylymı-praktıkalyq konferentsııasy ótti.

Konfrentsııanyń plenarlyq otyrysynda QMDB Tóraǵasynyń orynbasary, naıb múftı Kenjeáli qajy Qońyratbaıuly quttyqtaý sóz sóılep, QMDB Tóraǵasy, Bas múftı Naýryzbaı qajy Taǵanulynyń sálemin jetkizdi.

Sektsııalyq májiliste «Táýelsizdik jyldaryndaǵy zaıyrly qoǵamnyń turaqty damýyna Qazaqstan musylmandary dinı basqarmasynyń úlesi» atty taqyrypta baıandama oqyǵan naıb múftı: «Elimiz Táýelsizdik alǵan jyldarynan beri Qazaqstan musylmandary dinı basqarmasy dástúrli jáne zaıyrly dindi ustanyp, toleranttylyqty nyǵaıtýǵa baǵyttalǵan jumystar atqaryp keledi. 1992 jyly «Din erkindigi men dinı birlestik» týraly zań qabyldandy. Qazaqstanda Etnosaralyq qaqtyǵystardyń aldyn-alý jumystary qoıyldy. Osy oraıda múftııat bastamasymen birneshe is-sharalar ótkizilip, el tynyshtyǵy men dástúrli dinimizdi jańǵyrtýǵa zor úles qosyp keledi. Búginde quramynda birneshe bólimdi qamtıtyn Qazaqstan musylmandary dinı basqarmasy Ihsan ilimin negizge alyp, din men dástúrdi dáripteýde aýqymdy jumystar atqarýda», – dep atap ótti.

Sonymen qatar konferentsııada Senat depýtaty Bekbolat Orynbekov, Qalmaq memlekettik ýnıversıtetiniń (Reseı) professory, fılosofııa ǵylymdarynyń doktory Valerıı Badmaev, otandyq professorlar Ǵarıfolla Esim, Sábıt Muratuly t.b ǵalymdar baıandama jasady.