Naıb múftı stýdentterge dáris oqydy (FOTO)

Búgin QMDB Tóraǵasynyń orynbasary, naıb múftı, PhD doktor Ershat Ońǵar Nur-Múbarak stýdentterine arnaıy dáris oqyp, tájirıbesin bólisti.

Bilim alýdyń artyqshylyǵyna toqtalǵan naıb múftı: «Adamnyń bilim alyp jatqan ýaqyty – eń keremet, qaıtalanbaıtyn, tipti duǵa-tilekteri qabyl bolatyn berekeli kezeń. Dál qazir qabyl bolmasa da, kúnderdiń kúninde kezindegi armanyńyzdyń aqıqatqa aınalǵanyna kózińiz jetip jatady. Elimizdegi biregeı ıslamı ýnıversıteti qabyrǵasynda ótip jatqan ýaqyttaryńyzdy baǵalap, bilimge umtylyńyzdar. Paıǵambarymyz (oǵan Allanyń salaýaty men sálemi bolsyn): «Kimde-kim bilim izdený jolyna tússe, onda Alla oǵan jánnatqa aparar joldy jeńildetedi. Shynynda, perishteler mindetti túrde bilim izdenýshige razy bolǵanyn bildirip, qanattaryn jaıady. Shyn máninde, ǵalym úshin mindetti túrde aspandaǵy ári jerdegi búkil nárse, tipti sýdaǵy balyq ta, Alladan onyń kúnálarynyń keshirilýin tileıdi» degen. Bilim jaıly aıat-hadıster óte kóp. Eń bastysy ýaqyttaryńyzdy baǵalap, ustazdaryńyzdyń sońynan qalmaı bilim nárine sýsyndap úlgerińizder» dedi.

Sondaı-aq QMDB Tóraǵasy, Bas múftı Naýryzbaı qajy Taǵanulynyń bastamasymen 7 baǵytta qyzmet etip jatqan dinı mekemeniń jumys barysy jaıly da atap ótti. Bul stýdentter úshin bolashaqta jumysqa ornalasý máselesinde aldyn-ala baǵdar alyp, qazirgi ýaqyttan bastap daıyndalýyna keremet keńes boldy.

Stýdentter dáris sońynda kókeılerindegi saýaldar men týyndaǵan suraqtaryn qoısa, oǵan naıb múftı Ershat Aǵybaıuly tushymdy jaýap berdi.