Naıb múftı Jetisý óńiriniń ımamdarymen kezdesti (FOTO)

Qazaqstan musylmandary dinı basqarmasy tóraǵasynyń orynbasary, naıb múftı Kenjeáli Myrzabaev jumys saparymen Taldyqorǵan óńirinde bolyp, jergilikti ımamdarmen kezdesti.

Basqosýda naıb múftı dinı qyzmetti jetildirý, ımamdardyń qarym-qabiletin jan-jaqty kóterý týraly nasıhat aıtty. Sondaı-aq QMDB tóraǵasy, Bas múftı Naýryzbaı qajy Taǵanulynyń bastamasymen qolǵa alynǵan jeti baǵyt aıasynda jumystar talqylandy.

Birinshiden, meshitke kelgen jamaǵatpen jeke jumys isteý, olardyń turmys jaǵdaıyna, otbasyna kóńil bólý, múmkindiginshe kómek kórsetý. Jamaǵattyń basyn biriktiretin is-sharalar, sporttyq oıyndar uıymdastyrý máselesi de jıyn ózegine aınaldy. Ekinshiden, jastarymyzdyń ózge dinı aǵymdar jetegine ketýiniń aldyn alý, jas býyn ókilderimen baılanysty kúsheıtý, shákirt tárbıeleý máselesine nazar aýdarý qajettigin jetkizdi. Úshinshiden, ımamdardyń dinı saýatyn kóterý, HHI ǵasyr – bilim ǵasyrynda biliktilikti arttyrý, din qyzmetkerlerine fıqh, aqıda pánderinen tereńdetilgen júıeli dáris júrgizýdi, ımamdar arasynda tájirıbe almasý jumystaryn uıymdastyrýdyń mańyzdy ekenin sóz etti.

«Meshitti árkim óz úıi retinde sezinýi tıis. Dinı qyzmet – úlken amanat, saýapty da jaýapty jumys. Sondyqtan ıslamdy ımamǵa qarap túsinetindeı dárejege jetýimiz kerek. Dinı salada áste bosańsýǵa bolmaıdy» dep túıindeddi naıb múftı Kenjeáli Qońyratbaıuly .

Óńirdiń bas ımamy Almas Saǵıdollauly óz kezeginde naıb múftıge óńirdegi meshitterdiń dinı ahýaly, ımamdardyń qyzmeti jaıynda baıandap berdi.

Kezdesý barysynda Ihsan jylyna oraı jazylǵan ókildik ımamy Muhammed Ordybaıulynyń «Ihsan taǵylymy» atty kitaby tanystyryldy.

Barlyq sanıtarlyq talaptarǵa saı ótken semınarda ımamdar saýal joldap, pikir almasty.