Naýryzbaı qajy Taǵanuly 401-úıdiń kiltin tabystady (FOTO)

Bas múftı Naýryzbaı qajy Taǵanuly Batys Qazaqstan oblysyna jasaǵan resmı sapary barysynda Syrym aýdany Jympıty eldi mekeninde ótken «El úlesi – páterge» atty qaıyrymdylyq is-sharasyna qatysty.

«Zeket» qorynyń uıytqy bolýymen, jomart jandardyń qoldaýymen júzege asqan qaıyrymdylyq aktsııasynyń nátıjesinde jalǵyzbasty ana, baspanaǵa asa muqtaj Sveta Mertske úıdiń kilti saltanatty túrde tabystaldy. Svetanyń bir balasy múgedek eken. Bas múftı onyń otbasyna jaqsylyq tilep: «Alla Taǵala Quranda ár qıyndyqtan keıin bir jeńildik bolatynyn aıtqan. Otbasyńyzǵa amandyq pen bereke tileımin. Kishkentaı balalaryńyz óskende eldiń qamyn oılaıtyn, halyq ıgiligi úshin qyzmet etetin tulǵalar bolsyn. Islam qaıyrymdylyq dini bolǵandyqtan, biz qashan da óz múmkindigimizdiń aıasynda kómekke muqtaj otbasylarǵa qoldaý kórsetýdi jalǵastyra beremiz», – dedi.